adminURUDO Neshamba umgadli weqembu lamaMighty Warriors useveze ukuthi bayajabula ngaphansi komqeqetshi wabo omutsha uShadreck Mlauzi.
UNeshamba ukhulume lokhu ngesikhathi esenkambeni yokulolonga lapho amaMighty Warriors alungiselela umdlalo wawo leCameroon owomkhankaso wemidlalo yamaOlympics ka2016.
ICameroon idle iZimbabwe 2-1 kodwa inengi lezazi zenguqu zithi ithimu yesizwe yamantombazana le ilethuba lokugenqula iCameroon mhla kudlalwa ihlandla lesibili.
IZimbabwe ayikaze idlale kumaOlympics.
UNeshamba uthe ngendlela abaqhube ngayo kweleCameroon, umdlalo wabo kukhanya uzakubalula.
“Umqeqetshi wethu usikhuthaze kuhle ukuthi singalahli ithemba ngoba ithuba lokunqoba likhona.
“Lathi singabadlali kuyasikhuthaza ukuthi sidlalele ukwenza imbali ngokufikisa iZimbabwe okwakuqala kumkhosi wamaOlympics.”
Umdlali lo otshibilika esesiswini senkundla ubalwa kulabo ababeyinsika yokudlala kwesizwe.
Kusenjalo, kubikwa amankampani asedidizela ebangisana ukusekela ithimu yenguqu yamantombazana kulandela ukuzwa ukuthi isiseduzane lokwenza imbali.
Kubikwa kuhambo lokuya eCameroon, amaMighty Warriors aphathiswa okwedlulisileyo.
Lokhu yisiqalo kunguqu le ebidlalwa kungela ngitsho lendibilitshi esikhwameni sayo.
Ekhuluma lephephandaba likazulu uTheresa Magaraushe obona ngezokuncintisa kwalithimu ubike ngokuthaba okukhulu ukuthi ikomithi yakhe isivumelane lamankampani athile ukuthi ancede lapho enelisa khona.
UMagaraushe loba evume ngeliphezulu, uthe abakahlanganisi inani lamadola lempahla eziphe abadlali labaqeqetshi babo.
Online Reporter