Online Reporter
Zimpapers Sports Hub
INHLANGANISO yePremier Soccer League (PSL) kuleli, isibike ukuba amaqembu angaphansi kwayo avunyelwe ukuthi athengise utshwala enkundleni, ngenhloso yokuthi kukholisise abathandi labalandeli bomdlalo lokuthi amaqembu la athole imali.
Lokhu kuyingxenye yenhlelo zePSL zokuthokozisa lokuhuga ababukeli bomdlalo kulisizini. Phezulu kwalokho, i-PSL ithe izaqhuba imidlalo ethile, yabasakhulayo, phambili kokuthi kudlalwe imidlalo yeligi.
Kumidlalo le, iPSL ihlose ukuthi iphakamise ithalenta elisacathula kuleli. Ngokunjalo, inhlanganiso le ithe isinikeze amaqembu akuligi yayo ukuthi adinge amaqembu azadlala kungakatshayi ihola lesithathu emini, sekudlalwa umdlalo omkhulu.
Osaphethe isikhundla sikamaqhuzu wePSL uRodwell Thabe uveze lokhu ngesikhathi ekhuluma lentatheli yeZimpapers Sports Hub kuliviki.
Uthe phezulu kokuqoqa imidlalo le, lonyaka kuzathengiswa utshwala enkundleni ukuze bahuge ababukeli lokuthi amaqembu athole imali.
“Lonyaka sithi ababukeli phambili. Konke okwenziwayo kumele sibone ukuthi ababukeli bayeneliseka,” kutsho uThabe onguye odonsa amatomu kulezinsuku kuPSL ngemva kokusuka kukaKennedy Ndebele.
UNdebele watshiya isikhundla sokuba ngumaqhuzu wePSL esiyancintisa kukhetho lweZifa lapha akhethwa ukuba ngomunye wabasekeli ababili bomongameli uNqobile Magwizi.
“Sifuna abantu bangene enkundleni ekuseni, babukele abasakhulayo bamaqembu ethu. Ukubukela abasakhulayo kwenza bazane labalandeli babo, bondliwe kuhle kungela kutshwayelwa ukhwelo. Amaqembu afuze athengise utshwala lokunye enkundleni kulibazise abantu bakholise usuku lomdlalo,” kwengeza uThabe.
Imidlalo yamaqembu abasakhulayo le, eyaziwa ngokuthi ngama-curtain raiser, yayikhona kudala njalo ibinceda amaqembu ukuthi aphakamise abadlali abasakhulayo. Abadlali abancane laba balethuba lokubonwa, bebukelwe ngabantu abanengi, bathole lokuzethemba emdlalweni.
Ngesikhathi isakhona imidlalo le, amaqembu amakhulu ayesenelisa ukuqoqa imidlalo kumaqembu aphansi kuma Under-14, 16, 18. Ngalesi sikhathi kwakungela udlame enkundleni njalo ababukeli babengena ngesikhathi.
Umzekeliso wabadlali abenza kuhle ngokuqoqwa kwemidlalo le nguPeter Ndlovu kuHighlanders. Wayedlalela ama-Under 16 lama-Under 18 ngelanga linye, aphinde enelise ukutshibilikela iqembu elikhulu.
“Isizatho sokuqoqa imidlalo le ngesokuthi sithuthukise intsha ukuze ithole ukuzethemba lokutshisekela ukutshengisa ithalenta phambili kwabantu abanengi,” kutsho uThabe.
Uthe lokhu bakwenzela abadlali ukuze kukholise lomphakathi obukela inguqu.
“Okubaluleke kakhulu, kuhloselwe abalandeli ngo-2025. Sibeka abalandeli phambili. Lokhu kungokunye kwamacebo esilawo ukuthi sikhuthaze abantu bangene masinyane enkundleni.
“Inhloso yethu ngeyokujabulisa ababukeli ukuze benelise ukuthenga utshwala banike amaqembu imali.”
Kusukela ngo-2022, iPSL yanika amaqembu imvumo yokuthengisa utshwala kodwa kumele amaqembu la abelesithupha sokuthengisa lokuvumelana labanikazi benkundla, ugatsha lwezempilakahle le-Liqour Licensing Board. Kwananzelelwa ukuthi amaqembu alahlekelwa yimali enengi ngokwekela ukuthengisa okuthile ngelanga lomdlalo.
