admin
YiNtatheli kaMthunywa
UBRUCE Kangwa, umdlali weHighlanders osanda kuphiwa ithuba lokudlalela iqembu lamaWarriors uthe iLesotho kayisoze ilibone ibhola kodwa izabona inkanyezi nje kuphela ngeSonto ngoba bazimisele ukuthi beqedelane layo.
Amazwe womabili la adibana kumkhankaso wokudlalela ukufinyelela ama-final enkezo yeChan, adlalelwa yilabo abatshibilika kumaligi asemazweni eAfrica kuphela.
Umdlalo uzadlalelwa eBarbourfields ngemva kwesikhathi eside njengoba amaWarriors ebesebukelwa yizakhamizi zeHarare kuphela.
AmaWarriors aqale ukulolongela umdlalo lo ngoLwesibili koBulawayo enkundleni yeWhite City belomqeqetshi wabo uCallisto Pasuwa.
UKangwa ukhulume lephephandaba likazulu ngesikhathi iqembu lithethe ikhefu lokunatha amanzi lapho abike esenkambeni yokulolonga ngoLwesibili ukuba lithuba lamaWarriors ukuthi abezingqwele zenguqu yeAfrica.
UKangwa owaziwa ngelithi ‘Ama-ruce’ kubadlali benguqu ubike ngokuthaba okukhulu ngokukhethwa kuqembu ukuthi laye aphakamise umdlalo wakhe.
“Sengikhulile kulumdlalo. Ukukhethwa ukuthi ngidlalele isizwe kuyisibusiso. Banengi abakhalela ukubonakala kuleliqembu. Ngizasebenzisa ithuba leli ngiphathise amaWarriors ukuthi abezintshantshu zeAfrica,” kutsho uKangwa.
Kusenjalo, inhlanganiso yeZimbabwe Football Association ithumele iphephandaba likazulu umbiko wokuthi izakuba minengi imidlalo yamaWarriors ezadlalelwa koBulawayo lakwezinye inkundla.
Isikhulumi seZifa uXolisani Gwesela uthe kungumbono weZifa ukuthi imidlalo yethimu yamaWarriors isabalale.
“Sithanda ukwazisa abathandi bomdlalo wenguqu izwe lonke ukuthi amaWarriors azakuba lemidlalo eminengi azayidlala ephandle kwedolobho leHarare. Sesizwile ngezikhalazo zokuthi inkundla zeHarare yizo ezithole yonke imidlalo. Sikubone kukuhle ukuthi siqale ngimkhankaso weChan lo, silokukholwa ukuthi imidlalo elandelayo izaqhubeka idlalelwa phandle kweHarare ngoba amaWarriors ngawe lizwe lonke.”
Online Reporter