admin
Listen Ndlovu
ABALIMI sebekhuthazwe ukuthi balime idelele ngoba liyisilimo esilemali enhle njalo abangazitshayela imali ngaso umnyaka wonke.
UNkosazana Nobuhle Mlotshwa ongumlimi eRangemore ubike ukuba idelele yisilimo esiphangisayo ukukhula kungakho umlimi engazitshayela imali ngoba umkambo uvulekile.
“Nxa umlimi elungiselela ukulima idelele lakhe kumele alalise inhlanyelo azavuka eyihlanyela emanzini,” kutsho uNkszn Mlotshwa. Uqhubekele phambili esithi idelele likhula kuhle emhlabathini oyisidaka futhi ogcina amanzi.
“Idelele likhula kuhle emhlabathini oyisidaka njalo ogcinayo amanzi, kodwa umhlabathi wakhona akumelanga ubemanzi kakhulu.
Umlimi nxa egebha amagodi enhlanyelo kumele agebhe igodi elingaba yi-1cm njalo inhlanyelo yakhe engayigqibeli kakhulu ngoba incane inhlanyelo yedelele, engayigqibeli kakhulu iyasindwa ngumhlabathi ingasakhuli ngendlela efaneleyo,” kulandisa uNkszn Mlotshwa.
“Amagodi kumele atshiyane nge-45cm kusiya ku-60cm ukuze isilimo sikhule kuhle. Kukhuthazwa njalo ukuthi isilimo sihlale sikhitshwa amahlamvu nxa sesikhulile ukuze sitshiyelane indawo kusenzelwa ukuthi sikhule kuhle,” kuchaza uNkszn Mlotshwa. Ubike njalo ukuba idelele lifuna ilanga elinengi.
“Idelele yisilimo esikhula kuhle elangeni ngakho umlimi kumele aqinisekise ukuthi indawo yakhe alima kuyo ilelanga elifaneleyo ukuze isilimo sikhule kuhle njalo lokhu kwenza lesivuno sibe sikhulu.
“Isilimo sedelele sifuna ukuthelelwa noma amalanga alitshumi nxa kungabanga lezulu. Umquba umlimi angawufaka nxa umhlabathi wakhe ungela kudla njalo ufakwa nxa kudingakala,” kuphetha uNkszn Mlotshwa.
Online Reporter