Online Reporter
Nqobile Tshili
AMAPHOLISA akuleli asebike ukuba kawabuyeli emuva ukulwisaneni lodlame okubalisela lokubulawa kwepholisa lohlangothi lwe-Criminal Investigation Department ngesikhathi kudingwa izigebengu ngoLwesine ebusuku.
U-Detective Constable Cassandra Hove ubulewe ngokudutshulwa lapho yena lamanye amapholisa begijimisa izigebengu lezi elokitshini lePumula South koBulawayo.
Isehlakalo lesi senzakale ngehola lesitshiya galolunye, endaweni ebizwa ngokuthi kuseHabek.
Isikhulumi samapholisa u-Commissioner Paul Nyathi uthe baphezulu kokuphenya loludaba.
“Amapholisa eZimbabwe Republic Police aphenya udaba lokubulwa kuka-Detective Constable Cassandra Hove owe-CID Homicide koBulawayo mhlaka 6 Mbimbitho 2025, ngesikhathi kugijinyiswa izigebengu. Isehlakalo lesi senzakale endaweni yeHabek, ePumula South koBulawayo,” kutsho u-Comm Nyathi.
Uthe u-Commissioner-General uStephen Mutamba usethumele amazwi enduduzo ngokwedlula emhlabeni kuka-Detective Insp Hove.
U-Comm Nyathi uqinisekise ukuba kwenziwa uphenyo oluqinileyo, oluzaveza okwenzakeleyo. Uthe amapholisa asezimisele ukulwisana lodlame njalo bacela amalunga omphakathi abangaba lolwazi oluthile bancedise kubotshwe umsolwa.
“IZRP igcizelela ukuba akubuyelwa emuva ekulwisani izigebengu ezihlomileyo lamanye amacala odlame elizweni.
“Amalunga omphakathi angabe elolwazi ngalabo abadale lelicala ukuthi bathintane lamapholisa eComplaints Desk 0242703631 kumbe ku- WhatsApp number 0712800197.”
