adminYiNtatheli kaMthunywa
ABAFUNDI besikolo seDombodema High ePlumtree sebekhiphe ibhayisikopo (movie) ebizwa ngokuthi Charity ekhangelelwe ukuthi itshengiswe kumabonakude lonyaka.
I-movie le imumethe udaba lokuhlukunyezwa kwamantombazana lokuveza ubunzima obubhekane labesifazane nxa bethe bahlukuluzwa.
Iqula labalingiswa ababumbe i-movie le inengi labo ngabafundi bakulesi isikolo njalo basekelwe ngemali yinhlanganiso ebona ngezokuthuthuka kwesikolo lesi. Umqondisi wohlelo lokubunjwa kwalibhayisikopo uAndisiwe Sibindi uthe indikimba yabo igxile ekukhuthazeni uzulu ukuthi anakekele abantwana abangamankazana.
“IDombodema High ikhiphe i-movie le ekhangele impilo yomntwana oyinkazana okuthiwa nguCharity. Umntwana ukhula engazi uyise njalo ulahlekelwa ngunina ngemva kokugula isikhathi esdide.
“Umlingiswa wethu omkhulu uCharity ungumzekeliso wempilo esiyibona kulezinsuku. Umntwana lo ukhula engazi ukuthi uzaqalisela ngaphi. Impilo ayitsho lutho kuye ngoba akulamuntu omcebisayo,” kutsho uSibindi.
Ngokutsho kukaSibindi, abazali labanye abafundi beDombodema bajabula okwedlulisileyo mhla i-movie le itshengiswa emphakathini kuliviki.
“Abantu bayayijabulela i-movie yethu. Abazali labantwana basikhuthaze ukuthi siqhubekele phambili ngomsebenzi wethu.”
Ukuze i-movie le iphumelele, uSibindi uthe basebenza logatsha lokuthuthukisa umphakathi esikolo seDombodema kanye lenhlanganiso yeRestless Development.
Online Reporter