admin
Nkosilathi Sibanda
ABASEKELI boqobo beqembu leHighlanders sebenikezwe njalo amandla okusebenzisa ilungelo labo ngokuvotela inkokheli ezizaphatha isikhundla sikamsekeli kamgcinisihlalo lesikamgcinisikhwama ngeSonto.
Kulamadoda amahlanu avezwe phambili kwabalandeli balithimu okubikwa ukuthi bazimisele ukuthi bacele ukuvotelwa kuzikhundla lezi.
Kusikhundla sikamsekeli kamgcinisihlalo kuloKenneth Mhlophe, uNkosinathi Ncube loModern “Voltage” Ngwenya, abafuna ukusekela isihlalo sikaPeter Dube.
UDonald Ndebele obebambe isikhundla sikamgciningcebo uzatshikilisana loCharles Ndlovu kusikhundla sokugcina imali yeBosso.
Iphephandaba likazulu lixoxisane labalandeli beBosso mayelana ngamadoda la afuna ukungena esikhundleni sethimu yezwe lonke. Kukhanya inengi labasekeli elilamandla okuvotela umsekeli kamgcinisihlalo lizavotela uMhlophe.
Lanxa kunjalo kukhanya uNgwenya uza ngesivuvu ngosekelo alalo eHarare lakuhlekana labasekeli abaseGwanda lasePlumtree.
UNcube osencintise kumavoti la okweminyaka embalwa esehluleka laye uzabe ekhangelele amavoti kubasekeli.
NgeSonto kuzabonakala ukuthi ngubani ozadonsa kulabanye bonke kulumkhankaso wamavoti.
Amavoti kamgcinisikhwama yiwo angacaciyo ukuthi azaphuma njani. Kusikhundla lesi akulula ukucabangela ngoba abalandeli bangxazombili njalo inengi alikavumelani.
UNdebele ulosekelo oluvela ekuthini wenelise ukubamba imali yeqembu ngesikhathi ecelwe ukuthi enze umsebenzi lo endaweni kaJerry Sibanda osekuBulawayo City. Kuzwakala ukuthi bakhona abalandeli abasuthisekileyo ngomsebenzi awenzileyo.
UNdlovu engasithola lesi isikhundla ngokuvotelwa yilabo abasola ukungeniswa kukaNdebele ngesizini edluleyo.
Bonke laba sebethembise ukuthi bazenza izifiso zabalandeli lokusebenzela ukuphakamisa iqembu leli elihlezi phezulu kwesikwelede esibiza i$500 000.
UMthunywa ukhulume lamadoda acela ukuvotelwa ukubangabasekeli bakamgcinisihlalo, uMhlophe, uNcube loNgwenya.
UMhlophe, owaziwa njengosomabhizimusi koBulawayo ubike ukuba yena ukhethe ukuthi ayesekela isikhundla sikaDube ngoba ebizwe ngabalandeli beqembu abathe akula omunye umuntu ongenelisa ukwenza lokhu ngaphandle kwakhe.
“Ngibizwe ngabantu ngoba bengibona ngifanele ukukhokhela. Njengelunga leBosso kusukela kudala, ithimu le ngiyazi mhlophe kangiyiphumputhi. Sengileminyaka ngikhokhela inhlelo ezinengi emphakathini lakumabhizimusi.
“Ubukhokheli bami ngisekela umgcinisihlalo kuzenza inhlelo zethu zonke kuHighlanders zicacisise. Nxa abantu besithi ngincintise, angisoze ngibayangise.”
UNgwenya, ophinda abengumgcinisihlalo wabasekeli beBosso abaseHarare uthe: “Mina okwami yikuthi ngizoncedisa iqula labakhokheli abakhona. Ngingumncedisi. Usekelo engilalo luyamangalisa, abantu bathi Ngwenya sizakuvotela.
“Njengosomabhizimusi owaziwa izwe lonke ngithembisa ukubuyelisa iBosso ukuthi iphenduke ibeyithimu yezwe lonke. Ngilabangane abanengi abangosomabhizimusi abalindele ukuncedisa iBosso ngakho konke okufunakalayo kuzagcwaliseka. Isikhundla sokuba ngumgcinisikhwama sifuna umuntu onjengami.”
UNcube uthe okwakhe yikuthi angene ancedise ukuthi iBosso iphungule isikwelelede sayo.
“Okuhamba phambili kumkhankaso wami yikuthi siqedelane lesikwelede kanye lokuthi sibone amacebo okuthola imali yeqembu kumabhizimusi ethu ebhawa yeManwele lase-club house.”
Online Reporter