adminNkosilathi Sibanda
KUVUTHISWA igceke lokugijima kulimpelaviki lapho okuzancintisa intshantshu zezabelo kudingwa labo abazangena kuqembu lesizwe eMorris Depot, kubika inhlanganiso yeNational Athletics Association of Zimbabwe.
Isabelo sakoBulawayo sigijinyelwa zintshantshu zesiqubu ezingamatshumi amabili lambili, ezikhethwe kumaviki amabili adluleyo kumkhosi owenzelwe enkundleni yeWhite City.
Umncintiswano ozakwenziwa ngempelaviki ugoqela imango yamakhilomitha angu-6, 8 kanye le-21.
Isikhulumi seBulawayo Athletics Board uEmmanuel Mpofu ubike ukuthi iqembu elizagijimela iBulawayo liphezulu kwamalungiselelo wokuyanqoba eHarare.
UMpofu uthe balethemba kubaqeqetshi abalolonge abagijimi babo okwamaviki amabili, wathi okwenza bazethembe ngokuphezulu yikuthi balolonga besenkundleni yeWhite City.
“Ukulolonga siseWhite City kusipha ukuzethemba ngoba inkundla le ilempahla zonke ezisetshenziswa kumdlalo wokugijima. Siphambili kulezinye izabelo ezithwele nzima ukujwayela inkundla ezinjenga le.
“Kulandela ukuqhuba kakuhle umncintiswano wethu koBulawayo, sakhetha ithimu yabomama labobaba abangamatshumi amabili lambili. Bonke abakhethwayo sileqiniso lokuthi bazagijima banqobe. Le yiyo ithimu ethenjiweyo,” kubika uMpofu.
UMpofu uthe ithimu ezamela iBulawayo ilabagijimi abafana lalabo ababekhona ngomnyaka ophelileyo.
“Ngenxa yokuthi ngomnyaka ka2015 sasebenzisa iqembu labasakhulayo, kube lula ukuthi sisebenzisa ithimu esasilayo. Bakhona abatsha abangenileyo kodwa labo esasilabo ngomnyaka odluleyo benelise ukunqoba njalo, yikho phela silabo lakhathesi.”
Ithumu yakoBulawayo ilentshantshu zesiqubu ezibalisa uCynthia Taderera, uYvonne Mutara, uDumo Mkhwananzi, uDan Mlilo, uCharles Chiwanga, uBrenda Banda labanye abalokhe besidla ubhedu kumdlalo wokugijima kontuthu.
Online Reporter