Online Reporter
Nkosilathi Sibanda
I-HWANGE Local Board isiqalise ukusebenzisa indlela yakulezinsuku eye-Digital Citizen Engagement and Scoring Platform, eyaziwa njalo ngokuthi yiCitizen Scorecard, ngenjongo yokuqinisa ukubambisana phakathi kwekhansili lezakhamizi.
Njengengxenye yokuqalisa uhlelo lolu, ngeviki edluleyo kwenziwe umhlangano wokufundisa izisebenzi zekhansili, amakhansila lama-junior councillors ukuze bazwisise ukuthi iCitizen Scorecard isebenza njani lokuthi izanceda njani ekuthuthukiseni ukuxhumana phakathi kweHwange Local Board lomphakathi.
Kumbiko wayo ngalokhu, ikhansili ithe uhlelo lolu luzanika izakhamizi ithuba lokuveza imibono yabo, lokukhuluma ngalokho abakubonayo ekuhanjisweni kwemisebenzi yekhansili.
“ICitizen Scorecard yakhelwe ukunikeza abahlali indawo lapho abangaveza imibono, baphinde babelesabelo ekuhloleni ukusebenza kwekhansili,” kutsho iHwange Local Board.
Ikhansili ithe inyathelo leli liqakathekile ekukhuthazeni ukusebenza obala, ukuziphendulela kanye lokuqinisekisa ukuthi inkokheli zendawo ziyalalela izikhalazo lemibono yabantu.
Kusenjalo, amakhansila eHwange Local Board lama-junior councillors ngeviki edluleyo avakatshele amaphurojekithi atshiyeneyo aqhutshwa yikhansili ukuze bazibonele ngamehlo intuthuko eyenzakalayo kulindawo.
Uhambo lolu lunike ikakhulu ama-junior councillors ithuba lokufunda ngendlela amaphurojekithi ekhansili aqhutshwa ngayo.
Ngalindlela, iHwange Local Board ithe izaqhubeka iqinisa ukubambisana lezakhamizi, isebenzisa isenza amaphurojekithi aphendula izidingo zomphakathi ukuze kwakhiwe iHwange ethuthukayo.
