Online Reporter
Nkosilathi Sibanda
IJELE le-Anju eliseMatabeleland North seliphenduke laba yisibonelo esihle kwezokulima, njengoba selisenelisa ukugcwalisa isiphala sokudla okusekela uhlelo lukaHulumende lokuphakamisa ezokulima.
I-Anju Prison ilepulazi elikhulu elingamahekitha angu-203, phakathi kwawo angu-150 angaphansi kokulima kuthelezelwa lapho okulinywa khona umumbu, lengqoloyi.
Ijele le ihamba phambili ekulimeni inhlanyelo yomumbu, amathani angu-90 enhlanyelo evela kumahekitha angu-35 alinywa kusetshenziswa ama-centre pivot irrigation systems. Kukhangelelwe ukuthi kuphinde kutholakale amanye amathani angu-60.
Ipulazi leli liphinda lilime ingqoloyi ngaphansi kohlelo lweCommand Agriculture, njalo liyaqhubeka likhulisa ukulinywa kwamakhabitshi lamahanyanisi.
Isiphathamandla salijele, uChief Correctional Officer uButholezwe Moyo, uthe inhloso ngeyokuthi i-Anju Prison ibe yindawo ezimelayo kwezomnotho, ukutholakala kokudla, njalo ingaze yeyama kakhulu kuHulumende ekutholeni ukudla.
Kumbiko okhitshwe lugatsha lwe-Agriculture, Mechanisation and Water Resources Development ngoLwesine, uChief Correctional Officer uMoyo uthe: “Kulomnakano wokwengeza indawo yokulima ngokuthelezela ngokufaka amanye ama-centre pivot lokuthenga imitshina yakulezinsuku yokulima ukuze umsebenzi uqhubekele phambili. “Ngo-2030, i-Anju Prison ihlose ukuthi ilime ukudla okunengi, ingacini ngokukhangela izibotshwa kuphela kodwa isekele lamanye amajele asesabelweni seMatabeleland North, ngesikhathi sinye isize ukuthuthukisa ezokulima elizweni.”
