Online Reporter
Ethel Ncube
IKHANSILI yedolobheni lakoBulawayo inxusa abatsha kulelidolobho ukuthi bafake izicelo ku-2025 Youth Climate Action Fund (YCAF).
Uhlelo lweYouth Climate Action Fund lwaqala ngomnyaka ka-2024, luhlose ukunika abatsha amathuba okulungisa impahla ndawonye kumaphurojekithi akhangela ngokuguquka komumo womkhathi.
Kusitatimende, uSodolobho wakoBulawayo, uSenetha uDavid Coltart uthe inhlanganiso yeYouth Climate Action Fund yethula amathuba kwabasakhulayo abaleminyaka elitshumi lanhlanu kusiya kwengamatshumi amabili lane ukuba bancedise ukusungula inhlelo zokulwisa impumela zokuguquka komumo womkhathi koBulawayo.
“Ikhansili yakoBulawayo ithole usekelo lwemali engange US$100 000 ivela kuBloomberg Philathropies ukuze kusekelwe izinhlelo zokuncedisa ekwehliseni umthelela wokuguquka komumo womkhathi.
“Uhlelo lweClimate Fund Action lwaqala ngo-2024 lusekela abatsha ngemali kunhlelo eziphathelane lokuguquka komkhathi. Amaphurojekithi la aphela ngesikhathi esifaneleyo okwenza ukuba ikhansili yakoBulawayo iphinde ithole olunye usekelo lwemali,” kutsho uSenetha uColtart.
Ikhansili ikhuthaza abatsha ukuba bangathandabuzi ukufaka izicelo zemali nxa belamaphurojekithi athinta inhlangothi ezibalisa ukuhlanyelwa kwezihlahla, amandla alakho ukuphinda ukusetshenziswa (renewable energy), Imvelo lendalo (Environment and Natural Resources), inhlelo ezikhokhelwa ngabatsha ezinciphisa umthelela wokuguquka komumo kwezomkhathi kanye lokwenelisa ukuphila kuleyo nguquko (Youth- driven climate mitigation and adaptation), kanye lokwehlisa umthelela wamagasi aphuma kuma-green houses.”
