Online Reporter
Bhekimpilo Tshalibe
INKAMPANI yeCharles Steward Day Old Chicks ethengisa amatsiyane isixwayise abalimi abafisa ukufuya inkukhu kuzinga laphezulu ngendlela abangazilandela ukuze inkukhu zabo zibe ngezohlonzi lwaphezulu.
UMnumzana James Chinembiri ongu-Poultry Production Specialist esabelweni seMatabeleland kunkampani le ukhuthaze abalimi abafisa ukufuya inkukhu zomhlobo wama-broiler ngendlela abangaziphatha ngayo ukuze angafi futhi akhule kuhle.
Uthe ukhuthaza abalimi ukuthi nxa besiyathenga amatsiyane abo bevukele ekuseni ilanga lingakatshisi kakhulu.
“Sikhuthaza abafuya inkukhu ukuthi nxa besiyathenga amatsiyane abo behambe ekuseni ilanga lingakatshisi ngoba amatsiyane engatshiswa lilanga ayafa,” kutsho uMnu Chinembiri.
Uqhubekele phambili wathi ukhuthaza abalimi ukuthi bebase imbawula esilugwini bengakawafaki phakathi.
“Kusasele amahola angu-24 abalimi bengakafaki amatsiyane abo esilugwini, sibakhuthaza ukuthi bebase imbawula ukuze amatsiyane ethole ukukhudumala njalo amatsiyane alamalanga kafuni ukuhlaliswa endaweni eqandayo ngoba engangenwa ngumqando ayafa.
“Okunye, sikhuthaza abalimi ukuthi bekhangele ukuziphatha kwamatsiyane ukuze bebone ukuthi i-temperature esesilugwini iqondile, nxa ingayisiyo efunekayo bafake imbawula bayikhuphe,” kutsho uMnu Chinembiri.
Uthe ukhuthaza abalimi ukuthi bendlale utshani phansi.
“Sikhuthaza abalimi ukuthi bendlale utshani phansi ukwenzela ukuthi amatsiyane anganyatheli phansi ngoba engangenwa ngumqando.
“Okunye, sikhuthaza abalimi ukuthi behlale betshintsha lobotshani bungakabi manzi kakhulu,” kuphetha uMnu Chinembiri.
