admin
UKUBA sesimeni esibi akutsho ukuthi umuntu sokumele akhalale amaphupho akhe. Lokhu yikho okukholwa ngamalunga eqembu leKhaya Arts eseliguqule impilo zabantu abatsha emalokitshini akoBulawayo. UMthunywa uxoxe loFuture Dube owasungula iqembu leli.
Ngamafitshane sichazele ngeqembu lenu eselilodumo kangaka koBulawayo.
Ikhaya Arts liqembu lomgido elasungulwa ngo 2011, elikhangela imihlobo eminengi yemigido efana lama-radio dances, gumboot dance kunye lomgido wezomdabu.
Kwakutheni uze usungule leli qembu?
Kwakuyisifiso sami ukuthi ngelinye ilanga ngibe leqembu lami, ngoba kuqala ngingakalisunguli ngangingumqondisi weqembu elibizwa ngokuthi Simunye. Okunye okwangenza ngaba lentshukuntshu yokuqala leli qembu kwakuyikusiza abantu abatsha endaweni engihlala kiyo, eSizinda, basebelahleka endleleni eqondileyo ngokuswela ulutho lokwenza. ESizinda kugcwele abantu abanengi abavela eZambia kunye leNamibia. Inengi labo lalingasebenzi ngabona ithuba lokuthi ngilethe inguquko empilweni yabo ngincedisana le Youth Centre ukuthi benze ulutho oluthile ngempilo zabo.
Ikhaya Arts ilamalunga amangaki?
Ilamalunga angu-11, lokhe sikhangelele ukungenisa abanye abalesifiso sokusebenzelana lathi.
Kungani lakhetha ukusebenzisa ibizo elithi Khaya Arts?
Sakhetha ibizo leli ngoba sisenza izinto zakithi, okomdabu izinto zangekhaya.
Zikhona na ezinye inhlelo elizenzayo labantu abatsha eYouth Centre?
Lukhona olunye uhlelo esilubiza ngokuthi Lest we forget, lapha siyabe sikhumbula abaculi bakudala asebadlulayo emhlabeni. Ngenyanga kaNkwenkwenzi besilomcimbi sikhumbula iqhawe lomculo uSam Banda owayengumqondisi weqembu Isunduza.
Belunjani uhambo lwenu njenge Khaya Arts?
Uhambo lwethu belungelula. Nxa ungananzelela kulomcintiswano omkhulu kwezomculo ngakho bekungelula ukuthi udume wazakale endaweni ezinengi. Sekusiza kwezokugida, abantu balamakhetho kakhulu. Esikhathini esinengi uzathola ukuthi usekelo olutholayo nxa ugida ezomgido luhlukile kulalo ogida omunye umhlobo. Lokhu kucina kubangela ukuthi sicine sisenza eminye imicimbi mahala ukuze abantu basinanzelele njalo basazi njengeqembu.
Ukhona yini omunye umsebenzi owenzayo ngaphandle kokugida?
Akula omunye umsebenzi, ngahle ngazinikela ukuthi ngizenza lokhu sikhathi sonke.
Njengoba uthi lumsebenzi uwenza sikhathi sonke, wenelisa njani ukuthi uthole sikhathi sokuthi ube lemuli yakho?
Le inzima ngoba Ikhaya Arts ithatha isikhathi sami esinengi, ngakho isikhathi esincane engiyabe ngilaso ngisichitha kunye lemuli yami.
Mlayezo bani ongawunika labo abafuna ukuqala iqembu njengawe?
Engingakutsho yikuthi umuntu kabe kwazi akufunayo empilweni hatshi ukube eseqayeqa, abelokuzimisela, azihloniphe ngoba akula muntu ofuna ukuqhatsha umculi othanda izidakamizwa.
Online Reporter