Online Reporter
Media Mpofu
IZIKOLO zakuleli zidibene esabelweni seMasvingo kumidlalo yebhola likanobhutshuzwayo yezikolo eyeNational Association of Secondary School Heads (Nash).
Umqhudelwano lo, oqhutshwa minyaka yonke, uqalise ngoLwesithathu kuyonale iviki njalo ukhangelelwe ukuthi uphele ngoLwesihlanu. Amaqembu amankazana adlala eVictoria High School, kuthi abafana bancintisana eMasvingo Christian College.
Amathemba esabelo sakoBulawayo aphethwe ngabantwana beMagwegwe High kuhlandla labafana. Isikolo seMzilikazi yiso esileqembu lamankazana.
Ngokwakuqala abadlali beMagwegwe befikisa lelibanga lalumncintiswano, nanko bekuhlala kuyiMpopoma High kuminyaka edluleyo.
Kuhlandla labafana, ezinye izikolo ezincintisayo yiTsholotsho, Tongwe, Mavhudzi, Kuwadzana, Allan Wilson, Rio Tinto Zhombe, Howard, Judges College, Chibi, Rusununguko, Christian College le-Allan Wilson, eyaba yintshantshu nyakenye.
Kumankazana kuleMpandeni, Somvubu, Mzilikazi, Mabvuku, Nyamidzi, Dzivarasekwa, Dove, Pfupajena, Victoria, Chibi leGoromonzi.
Umqeqetshi weMagwegwe High uSimbarashe Tinago, uthe kuyamjabulisa ukuthi iqembu labo lifinyelele ukuya kuma-final ezabelo, ngemva kokulinda isikhathi eside.
“Ukuze sifike lapha kube ngumsebenzi onzima. Silwile, kwathunqa uthuli emidlalweni yethu yonke, sihlose ukuthi sinqobe size sifike lapha esikhona.
“Silethemba lokuthi sizanqoba ezinye izikolo eMasvingo. Nxa konke kungahamba kuhle, inkezo izaphenduka koBulawayo,” kutsho umqeqetshi lo.
Ekhuluma leZimpapers Sports Hub, umphathisikolo okhokhela inhlelo zomdlalo wenguqu esabelweni seMasvingo, uCossam Mabaso uthe: “Samukela amaqembu wonke aphuma kuzabelo zelizwe.
Sizimisele ukuthi siphathe kuhle izivakatshi zethu lapha eMasvingo, silethemba lokuthi abadlali bazancintisana kakuhle, bakhe ubudlelwano labanye, kubukelwe ibhola elihlabusayo. Imidlalo le yikho lapho okuqala ukubonakala kwethalenta elisakhulayo.”
