Online Reporter
Lovemore Dube
EZIQINTINI zeLupane, eMatabeleland North, abantwana besikolo kabagijimisi amabhola kuphela, balungiselela lekusasa labo elihle.
La ngamazwi kaTimothy Volo-Sibanda osebenzela kwele-United Kingdom, othe ukholelwa ekuthini ezemidlalo ziqakatheke ngezinga elifanayo lokubala ingwalo ekilasini.
Ukhulume lokhu ekumkhosi wemidlalo oweLupanda Primary Schools Cluster Annual Sports Gala ngoLwesihlanu ngeviki edluleyo.
“Ukuzivivinya umzimba kuyasiza abantwana ukuthi babe lempilakahle. Kunciphisa ukuba lemizimba ekhuluphele kakhulu, isifo setshukela lezinye inkinga zempilo.
“Ezemidlalo zifundisa abantwana ukusebenzisana lokuxhumana, okuyikho okubaluleke kakhulu ekuphileni kwansuku zonke emphakathini. Ukusebenzisana, ukuxhumana, lokubambisana kubalulekile, ngitsho lalapho nxa sebekhulile,” kutsho uVolo-Sibanda.
Kuncintise amaqembu ayisithupha kumdlalo wokuqaga lenguqu, kodwa insika bekungasi kuncintisa kuphela.
Bekuyikusebenzisa ezemidlalo ukuvusa ukuzethemba kubafundi lokwakha isimilo sabo.
“Ezemidlalo zihuga umphakathi, zihlanganise abantu abavela endaweni ezitshiyeneyo. Kunceda njalo ukuthi abantwabethu batshengise amathalenta abo.
Lokhu okuzadala ukuthi babonakale, baphiwe amathuba wokuthi badlalele amaqembu amakhulu kumbe baye kwamanye amazwe lapho abazaguqula impilo zabo zibengcono.”
Uthe ukuzithoba lokwazi ukugcina isikhathi kumele kufundiswe abantwana ngoba kuzanceda kwelakusasa.
“Kumele bakufunde lokhu besasebancane ngoba kuzabaphathisa kakhulu sebekhulile. Ukungazi ukugcina isikhathi kuzabahlupha nxa sebethola ama-contract phetsheya.”
Imidlalo yeLupanda le ibisekelwe nguColonel Miniyothabo Baloyi-Chiwenga, obenguMhlonitshwa omkhulu, waphinda wanikeza iUS$2 000 kukomithi yama-cluster ekhokhelwa nguFrancis Nkomazana.
Owake wabangumdlali wenguqu uMadinda Ndlovu, ubekhona. Ukhuthaze abazali kulindawo ukuthi basekele amathalenta abantwana.
“Yekelani abantwana benze okunengi. Kayisibo bonke abalesiphiwo ekilasini.”
Uthe usebone abadlali abasakhulayo abalethalenta eLupane laseGwanda njalo uhlose ukuthi abangenise kuma-trial eHighlanders U13.
Emidlalweni, iqembu leMasungamala linqobe iPhumakanye 1–0.
