Online Reporter
Brandon Moyo
UMDLALI we-chess uCastro Sibanda ubeyintshantshu yomncintiswano wesibili weProud Wawa Moyo Tournament obusesikolo seGifford High School.
USibanda unqobe intshantshu eyesatshwayo kuleli uTapiwa Jele ngemva kokuba bobabili beqede umdlalo ngokulingana kodwa behlukaniswa ngohlelo lwe-Bucholz. Bebelingene ngemiklomelo eyisithupha ngemva kwamahlandla ayisikhombisa.
USibanda uphiwe umvuzo weR10 000. Kusigaba sabesifazane kunqobe uTehilah Makwiranzou oleminyaka engu-12 yokuzalwa. Unqobe uNomalungelo Mathe kusetshenziswa i-head to head, baqede umdlalo belemiklomelo emihlanu ngamunye ngemva kwamahlandla ayisithupha. UTehilah uthole R1 800.
USibanda uthe okwenze wanqoba yikuba lenhloso lokuzimisela.
“Okwakuqala ngibonga abasekela umncintiswano ngemivuzo yemali lokuqoqa ukuhlangana kwabadlali. Ngikholise kakhulu ukuncintisana labanye lokubona abasakhulayo abathanda umdlalo wethu.
“Ngikhuthaza bonke abasakhulayo ukuthi bakhuthalele umdlalo, badlale ngokukhuthala okuphezulu. Okuqakathekileyo yikuhlala silolonga, silungiselela imidlalo,” kutsho umdlali lo.
UMakwiranzou uthe utshengisele ukuthi iminyaka yokuzalwa kayitsho lutho kumdlalo we-chess.
“Ngihlala ngifuna ukuzinikeza imidlalo yaphezulu ngakho ngiyitholile kulumncintiswano. Yikho okumele sikwenze njengabadlali abasakhulayo, singesabi ngoba iminyaka yokuzalwa kayitsho lutho. Nxa umdlalo uwazi njalo ulungiselele, uyanqoba kalula.”
Umncintiswano lo, obuqoqwe yinhlanganiso yeSayi Technical Foundation leBulawayo Chess Association, uyisikhumbuzo somdlali osewadlula emhlabeni uProud Wawa Moyo. Umgcinisihlalo weBulawayo Chess Association uLiberty Moyo uthe babonga abasekele lumncintiswano.
“Siqoqe lumncintiswano sahlanganisa abadlali abavela endaweni ezitshiyeneyo kuleli. Ukuphumelela komncintiswano kwenziwe yikuthola usekelo oluvele kuSayi Technical Foundation leDewa Branding Limited.
Sibonga njalo lesikolo seGifford High ngokusipha indawo yokudlalela. Kasikhohlwa labazali babantwana besikolo labaqeqetshi,” kutsho uMoyo.
Omunye wabaqoqi bemidlalo, uBruce Moyo uthe umdlalo we-chess ubaluleke kakhulu emphakathini ngoba ukhipha abantwana ezitaladeni.
“Ngilapha engikhona empilweni ngenxa ye-chess. Iyakhaliphisa ingqondo njalo ngikhuthaza abasakhulayo ukuthi beyidlale. Abazali lababalisi kabakhuthaze abantwana ukuthi bafunde lumdlalo. Uzabavikela entweni ezimbi lokuthi bengatshoni bebhoda ezitaledeni emalokitshini,” kutsho uMoyo, ongumfowabo kamuyi.
