Online Reporter
Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Abelaphi abalezinyoka
Siqala ngokukhangela ukuthwasiswa kwamadlozi atshiyeneyo. Isangoma: Ngaphandle kokugulisa, umuntu ophunywa yibungoma ubonakala ngokwenza izinto ezingejwayelekanga. Kwesinye isikhathi usuka aqonde egangeni abuye esethwele inhlanthu afike ayibulale phakathi kwabantu.
Uma selibanjiwe-ke idlozi lelo umnikazimuzi uhlanganisa umuzi wakhe abikele abaphansi ngokubika kumnini sibaya esithi:
“Lapha ekhaya sesibambe umntwana ohlutshwa zinyoka. Kasazi kumbe ngezakwenu kumbe ngeziza ngabomama kumbe ogogo kodwa sithanda zivele izinyoka lezi. Sizabamba amabele ngosuku olungaka (luqanjwe usuku). Mhla ebanjwa amabele, ogulayo lowo ophunywa lidlozi lelo uyawabanjiswa amabele abikwe abesethanjiswa ke amabele lawo.
Izalungiswa imithombo leyo buze buphekwe utshwala. Kuzakuthi-ke mhla kunathwa idlula, utshwala buzanathwa ngakusasa, umdeni ubuthane ukuzekwemukela idlozi elibanjiweyo. Utshwala obunathwa mhla buhluzwayo, bona ngokwabo kulindelwe ukuthi bunathwe kusisa.
Besebelibuza-ke idlozi lelo, kuzakuthi-ke sebenatha iqhaganyana lelo omunye asuke agiye athethe athi:
“Kithi kakuzange kube lamadlozi anje! Nxa ekhona kawavele siwabone.”Wenza kanje idlozi lize lifike. Selifikile idlozi lakhona liyazibika: “Mina nginguzibani, Ngivela endaweni engaka. Umsebenzi wami ngowokuvumisa, ngilobungoma.
Besebelibuza-ke idlozilelo: “Pho ufuna ukuthi uyesetshenzwa ngaphi?”
Lingaphendula lithi; “Thathani isigojwana sami liyengikhonzela kuzibani.”
Nxa kuthiwa isigojwana kutshiwo lowo ogulayo onguye ophunywa lidlozi. Idlozi lelo lihle liqambe lona lapho okumele liyethwasa khona.
“Sebenzani umsebenzi wenu uqale wedlule.”
Kuzakuthi usuphela umsebenzi isigulane leso singasekho sesithethwe lidlozi lelo. Umuntu wakhona usuka-nje aphaphatheke anyamalale. Uzasiwa lapho idlozi lelo elifuna ukuthi ayethwasiswa khona. Abalapho kulowo muzi bazabona ngomuntu esefika egaxe waphelela bathi bembuza ukuthi uvelangaphi njalo ufunani alandise konke.
Bona-ke sebezathuma umuntu lapho okusuka khona leso sigulani, bafike banikwe imithetho yalapha ekhaya. Nxa kuyikuthi idlozi libatshelile lapho elifuna ukuthi isigojwana salo siyethwasiswa khona usezaqhutshwa-ke ogulayo asiwe kulowo muzi.
Bazakuthi befika lapho bathi:
“Inyoka yethu iqome khonapha ekhaya,Ilobungoma izethwasiswa”.
Lowo othwasiswayo angabemukela usebanika imikhuba yakhe yenkundla yakhe. Inkundla phela kutshiwo lapha olaphela khona. Phela isangoma selaphela ngaphandle komuzi.
