Online Reporter
Ethel Ncube
KULEMULI yeBinga ethwele amagabha avuzayo njalo engasabuquthi ubuthongo ngenxa yabondofa abachitha ukudla, batshise izinto baphinde bantshontshe lamaphenti abomama.
Indaba le ivele ngeviki ephelileyo lapho uMnumzana Sabelo Muleya ebike kwezinye izakhamizi ukuba udinga usizo ngoba bathwele nzima njengomdeni ngenxa yabondofa.
Ekhuluma lentatheli uMnu Muleya ubike ukuba abasabuquthi ubuthongo njengemuli ngenxa yabondofa laba.
“Sithwele nzima njengomdeni, asazi lokuthi senzeni. Into le yaqala kanje, umzukulu wayepheka isitshwala emlilweni.
Eseqedile watshiya imbiza esiya emkulwini wathola imbiza isiwele phansi isitshwala sonke siphansi sathi yebo kumbe nguye owenze iphutha.
“Ngelanga elilandelayo kwapheka ugogo, uthe eqeda nje silinde ukuthi kuphakululwe sabona imbiza isimbokothwe phansi isitshwala sesigcwele inhlabathi manje lapho wonke umuntu wayekhona.
“Ngelanga lesithathu sathi sisiyalala sezwa kulabantu abagijimayo endlini sathi sifika asibonanga muntu, ingubo sazithola zimanzi zonke zithelwe ngamanzi. Kwesinye isikhathi siyavuka singelangubo sizithathe phandle emadabukakusa, ukuthi ngubani ozithwalayo siyabe singaboni muntu. Izigqoko zabomama zensitha ziyathathwa zinyamalale lazo,” kubika uMnu Muleya.
Omunye welunga lomdeni okhulume lentatheli uNkosazana Sibongile Dube ubike ukuba basazama ukuzwa ebantwini.
“Sadinga omunye ubaba wathi kulondofa emzini wethu, ufuna ukuthiywa. Into le iyasihlukumeza kakhulu. Izicathulo lamayunifomu abantwana sesikugcinisa komakhelwane ngoba nxa sivuka ekuseni sifica kungekho.
“Ekudleni lapha sidla nzima ngoba imbiza iyakutulwa kuchitheke isitshwala, nxa sisidla uyacupha kabili okwesithathu umganu uyabe sugcwele inhlabathi. Okwakhathesi sisazama ukuba abantu esabadingayo balungise umuzi ngoba siyahlukumezeka, izinto ziyacatsha, kunyamalala izicathulo zabantwana, amaphenti lawo kuyathatha.
“Amaphenti sesisenza okokuthi lapho esiwabeka khona sifake isawudo lamatshe, ungavele ukhohlwe awulitholi. Isimanga kuthatha awobomama kuphela, awamadoda kuyatshiya. Asazi ukuthi sihlukunyezwa yisibungu bani kabuhlungu kangaka,” kuphetha uNkszn Dube.
