adminNYIKA yeIndia yakazvipira mukusimudzira dzidzo yemuZimbabwe kuburikidza nekupa mabhezari kushasha dzezvidzidzo zvakasiyana zvinosanganisira zvekusimudzirwa kwemaruwa nekushandiswa kwemichina yechizvino-zvino.
Mashoko aya akataurwa nguva yadarika nemumiriri weIndia muZimbabwe, Ambassador Surinder Datta, pamhemberero dzezuva reIndian Technical and Economic Cooperation Programme (ITEC) muHarare.
“Ticharamba tichibatsira nemabhezari ezvidzidzo zvinounza budiriro yenyika, zvinosanganisira IT & Telecommunications, management, mabhizimisi madiki nekusimudzirwa kwemaruwa.
“Donzvo nderekuti Zimbabwe ikwanise kuzviitirawo zvakaita sekugadzira mishonga, migwagwa, kusimudzira mabhizimisi madiki anovandudza upfumi hwenyika nemabasa anosimudzira vagari vekumamisha,” vakadaro Ambassador Datta.
Vakati India, kubvira mugore ra2010 yabatsira vadzidzi vemuZimbabwe vanodarika 600 nemabhezari ekuti vaite zvidzidzo zvakasiyana kunyika yavo.
“Tinovimbisa zvakare kuti chirongwa ichi chicharamba chichienderera mberi mugore ra2016. Tiri kutarisira kupa vadzidzi vane chitsama mabhezari kupfuura makore adarika,” vanodaro Ambassador Datta.
Vachitaurawo pachiitiko ichi, gurukota rezvekushanyirwa kwenyika, Cde Walter Muzembi, vakatenda nyika yeIndia nekubatsira kwairi kuita kusimudzira dzidzo yemuZimbabwe.
“Tinozvikudza zvakadai izvi. Zvakakoshera budiriro yenyika apo vadzidzi vanenge vapedza zvidzidzo vanouya vachishandira nyika,” vanodaro Cde Mzembi.
“Tinotenda nemabhezari aya uye tine chivimbo chekuvandudza upfumi hwenyika yedu takazvimiririra.”
Chirongwa cheITEC chakaparurwa nehurumende yeIndia mugore ra1964 nedonzvo rekubatsira nyika dzichiri kusimukira muupfumi hwadzo.
Online Reporter