Online Reporter
Ethel Ncube
INHLANGANISO ye-Agritex isiveze ukuthi ingalukhuni zilemali enhle kungakho abalimi bangangena kubhizimusi lokuzifuya bazitholele imali enhle.
UNkosazana Lindiwe Moyo ongu-Agritex Officer uveze ukuba ingalukhuni zilemali njalo azihluphi ukufuywa.
Ekhuluma lentatheli ubike ukuba umlimi kumele akhangele izinto ezithile nxa ezifuya.
“Ingalukhuni azihluphi ukufuya. Okumqoka umlimi okumele akukhangele yilokhu ukuthi isilugu sakhekile kuhle njalo siyangenisa umoya.
“Nxa uvalela ingalukhuni zakho ungaze wazihlanganisa lenkukhu ukuze zingathelelani imikhuhlane.
Isilugu sakho kumele ubone ukuba siyangena umoya loba kugodola kumele ubone ukuba umoya uyangena ngoba ingalukhuni ziyamelana lomqando,” kubika uNkszn Moyo.
Uqhubekele phambili eveza ukuba okunye okumqoka yikudla.
“Kumele ubone ukuba ingalukhuni zakho uyazipha ukudla kusiya ngokuthi zinganani. Ukudla zidla okuhambelana lokuthi zinganani ingalukhuni zakho ukuze zikhule kuhle. Kumele njalo zivikelwe ukuze zingabanjwa ngamagola kumbe ukuntshontshwa.
“Ingalukhuni nxa sezikhulile zibiza iUS$30 kusiya kuUS$40 eyodwa, nxa uzifuye zabanengi yimali enhle njalo abafuyayo balutshwana kungakho abalimi bangazitholela imali enhle ekuzifuyeni.
“Okumele umlimi akuqakathekise kakhulu yikuthi isilugu sakhe sihlala sihlanzekile njalo singena umoya, ukudla kutholakale, amanzi okunatha kunye lemithi efaneleyo.” kuphetha uNkszn Moyo.
