Online Reporter
UGOGO ozala ubaba wayekujwayele ukuthi nxa kufika isikhathi sobusika athi yisikhathi samavila ngoba ezatshona othamele ilanga emadwaleni njengemipankwa ngoba kuyabe kuqanda njalo kulomoya omkhulu.
Abanye ngaphandle kokuthi batshone bothamele ilanga, bahle bangene phakathi kwengubo bengafuni lokuvuka bavuswe yikuthunywa yiNkosi kumbe indlala nje kuphela.
Loba kunjalo, isikhathi sebusika yisikhathi esihle ebantwini abakhutheleyo ngoba ulakho ukusebenza kuhle ungatshiswa lilanga. Abanye njalo bathi ilanga liyaphangisa ukutshona uthi usalibele umangale selitshonile, ubusuku bakhona bathi bude okutsho ukuthi ebantwini abathanda ukulala balala obukaBhuka.
Isikhathi lesi njengoba sinconywa ngabanengi kodwa silengozi ezithize, ngeviki edlulileyo kwelinye idolobho kulemuli etshelwe yindlu kwatsha konke obekuphakathi, uphahla lwaze lwawela phakathi kwasala kume umduli wendlu.
Kunjenje imuli yakhona igciniwe kwelinye isonto lapho abaphiwa ukudla kanye lezigqoko. Kubikwa ukuthi ingozi le yabangelwa yikuthi okhekhe babasa imbawula basebejunywa yibuthongo baphaphama sekugcwele intuthu baphaphatheka besiya phandle kodwa ngokusweleka kwenhlanhla impahla zatsha zonke.
Yisikhathi esibi lebantwaneni besikolo ngoba bavuka ngovivi lukaMagadelena besiyabheka uJesu emathuneni, ihola lesithupha litshaya kusesemnyamanyana, lamanzi nxa engakhudunyezwanga ukuthi umuntu ageze ngawo kuyabe kutshaya intshongolo esika lalapho sebesiya esikolo kumele bagqoke impahla ezikhudumalayo ukuze izifundo zingene kuhle.
Kungehlula ukuthi akhudumale uyaqhuqha esikolo abanye njalo bathi yisikhathi esihle sokufunda ngoba izifundo zingena kuhle lesikhathi sokuwozela awusitholi ngoba uhlala uqaphele. Ngikhumbula omunye umngane wami sisafunda ezingeni eliphansi wekela isikolo esesaba ukutshaywa ngotitshala bemtshayela ukuphuza ngoba wayephuza njalo lukhale uswazi ngapha amakhaza etshaya, wavela wazonda imfundo.
Kwezinye indawo siyasizwe kuthiwa abantu bathe besesilindweni samabhasi babasa umlilo bakhohlwe ukucitsha ibhasi sifikile, bangene ebhasini kusale kulumatha iganga, lamasela lawo, ikakhulu emadolobheni basebenzisa lesi isikhathi ukugila imikhuba yabo ngoba bekwazi ukuthi abantu bayalala bathi nya bangezwa noma yini enyakaza phandle.
Isikhathi lesi sihle emuntwini olempahla ezinengi zokugqoka nxa zisilela umqando uyakuphephuluza.
Ayixabene.
