Online Reporter
YiNtatheli kaMthunywa
IMALI ephuma kuhlelo lwe-devolution isidale umehluko omkhulu ezigabeni ezisemaphandleni, ikakhulu eBinga, esabelweni seMatabeleland North.
Uhlelo lwe-devolution olukhankaselwa nguHulumende luhlose ukuletha ingqubekela phambili kundawo ezikade zasalela emuva. Ngenxa yokuzimisela ekuthini zonke indawo zithole impilo elempucuko, uHulumende usesebenzise isikhwama semali ye-devolution ukuthi kungabi lomuntu kumbe indawo esalela emuva. Isigaba seBinga, njengazo zonke izigaba eziphandle kwamadolobho kuleli, sesithole usizo ngaphansi kohlelo lwemali ye-devolution.
Izakhamizi zesiqintini seKaani, eBinga ziyafakaza ukuthi isikhwama se-devolution silethe inguquko empilweni yazo kulandela ukwethulwa kwekilinika yeKaani, yiBinga Local Board.
Ikilinika le, evulwe yethulwa emphakathini ngoNhlolanja lonyaka, kukhangelelwe ukuthi iguqule ezempilakahle kuzakhamizi zakulindawo, ezikade zihamba imango emide zidinga usizo lwezempilakahle emakilinika akwezinye indawo.
Umphathintambo obona ngezomsebenzi womphakathi eBinga Local Board, uMnumzana Sam Mwinde uthe ikilinika yeKaani kwakumele ibekhona kudala kulindawo. Wethule ukubonga ngemizamo yekhansili yokuguqula isakhiwo esasikhona saba yikilinika esebenzayo.
“Le bekuyindlu, isiphendulwe yaba yikilinika. Enye imali yempahla esetshenziswe ekwakhiweni kwekilinika le ivele kuHulumende weZimbabwe ngesikhwama se-devolution,” kutsho uMnu Mwinde.
Amanye amakilinika akhiwe kusetshenziswa isikhwama se-devolution esigabeni seBinga agoqela iZambezi Clinic ekuWard 9, Sinamusanga, Kalungwizi, Malaliya, Chipale, leSiabuwa.
