adminCornelius Luphahla
INDUNA zemangweni weBinga sezifuna ukuvumbulula abanye oPeter Ndlovu benguqu, nanko phela sezivuleke amehlo zakubona ukuthi inguqu ilemali kungakho-ke sezibike ukuthi kusukela kulisizini zizabambana kuhlelo lwazo lokuthuthukisa inguqu yesigaba sesibili.
IBinga ngesinye sezigaba ezilamathimu adlala kumaligi amancane akuZimbabwe Football Association kodwa balutshwane abadlali abaphuma kulindawo abayakhatshana ngomdlalo.
Inyathelo lenduna zeBinga kukhangelelwe ukuthi lithabise izakhamizi zakulumango esezikhale zaze zoma ngokuswela usekelo lokuphakamisa ezemidlalo.
Induna eziphezu kwenyathelo leli nguSiansale ophinda abenguSenetha loNekatambe. Induna uSiansale ileqembu elibizwa ngokuthi Kariyangwe FC kuthi uNekatambe ohlala eCross Dete uleqembu elithiwa yiCross Dete United.
Kumaviki amabili adluleyo amaqembu la adibane enkundleni yeKariyangwe kwabaluthuli. Kulumdlalo iKariyangwe inqobile nanko phela ihlohle amabhola amane kwathi iCross Dete yahlohla amabhola amabili. Umdlali odlale kulabo bonke kube nguLusutuko Mumpande.
UMthunywa ukhulume lenduna uSiansale yachaza ukuthi babahlanganise amakhanda lomunye wakhe bejonge ukuthuthukisa izigaba zabo.
“Amaqembu la sawasungula ngemva kokunanzelela ukuthi bakhona abafana abaleziphiwo zebhola kule indawo noma nje beswela lapho abangaziveza khona. Lapha sijonge ukuthi baveze obala iziphiwo zabo ukuze amaqembu amakhulu abathathe bayewadlalela.
“Okunye njalo sanenzelela ukuthi abafana abanengi bahlezi lapha abenzi lutho okucina kudala ukuthi bacabenge ukuganga okufana lokutshontsha kumbe ukunatha utshwala kulokuthi babelakho okokwenza okungathuthukisa impilo zabo. Yikho nje sasungula umdlalo webhola ukuze baswele isikhathi sokucabanga ukwenza okungalunganga,” kutsho uSenetha Siansali.
Ikhuluma loMthunywa induna uNekatambe ichaze ukuthi bakhangelele ukuyadlala leHwange ukuze abadlali babo abaleziphiwo kunguqu babonakale.
“Khathesi sesihlele ukuthi sihlanganise amaqembu ethu siyedlala leqembu leHwange ukuze nxa kukhona abadlale kuhle abafunwa ngamanye amaqembu kumbe yona iHwange ibathathe ibathuthukise emdlalweni lo,” kuphetha induna uNekatambe.
Online Reporter