adminUGOGO oleminyaka engu-60 yokuzalwa ukhala ngobudedengu bezisebenzi zesibhedlela abamnike amaphilisi okuthithibalisa ingculazi ama-ARVs esikhundleni samaphilisi esifo somfutho wegazi (BP) lawamathambo.
Ugogo, igama lakhe eligodliweyo ukuze avikelwe, kuthiwa ugule kwaba sengathi uphambanelwa likhanda kulandela ukunatha lamaphilisi, alandwe yindodana yakhe esibhedlela seMambedwini, KwaSwayimane kweleSouth Africa.
Ngemva kokusebenzisa amaphilisi la ugogo kuthiwa wazwakala ememeza omakhelwane ekhala ngokuthi ubona indlu sengathi iyamncindezela.
Sekukhangelisiswa kutholakale ukuthi unathe amaphilisi angayisiwo.
Ekhuluma leSolezwe ugogo uthe wayengenelisi ukuya esibhedlela kungakho-ke wathuma indodana yakhe lekhadi lakhe lokulanda amaphilisi elichaza konke kwazise ujwayele ukulanda amaphilisi akhe kulesosibhedlela.
“Indodana yami yabuya lamaphilisi iwanikwe ngabesibhedlela. Ngamangala ngoba ngangingawajwayelanga abuya lawo kodwa wathi umongikazi uthe yiwo okumele ngiwanathe. Nganatha amabili ngoba kungabhalwanga phandle ukuthi anathwa njani. Ngananzelela ukuthi makhulu kulalawo amahlanu engiwajwayeleyo. Ngemva kwalokhu kwasokungathi ngihanjelwa yingqondo. Ngasengibona indlu sengathi iyawa, ngabona abantu sengathi bayakikiza ngahle ngamemeza omakhelwane ukuba bangisize. Bafika bangitshela ukuthi nginathe amaphilisi angayisiwo,” kutsho ugogo.
Lesi saguga kuthiwa sithumele izingane zaso labanye omakhelwane ukuyolungisa leli phutha esibhedlela kodwa akusizanga lutho.
“Bese ngigula ngingakwazi lokuhamba ngiphelelwe amandla. Umzimba ubuqhaqhazela ngivuvukile umzimba wonke, ngibona kwenziwe yikunatha amaphilisi angayisiwo. Abesibhedlela bangenzele okunye njengoba lalamuhla angizizwa kahle,” kutsho ugogo.
Isolezwe lihabule ukuthi ajwayelekile amaphutha okunikezwa kwezigulane amaphilisi angayisiwo kulesosibhedlela.
Omunye wabomakhelwane ocele ukungavezwa igama esesaba ukucalwa ngoba ujwayele ukuya kulesosibhedlela uthe abasebenza kuwo babudedengu.
“Akusikho okokuqala ukuba kube lephutha elinje kulesiya isibhedlela. Okubuhlungu yikuthi omongikazi abanaki.
Ngesikhathi sizama ukushintshela ugogo amaphilisi kufike omunye obekhala ngokuthi bamnikeze ama-ARV’s angayisiwo. Izikhathi ezinengi kukhona abantu abangakwazi ukubala ngakho uma benikwa amaphilisi bahamba lawo ekhaya bayowanatha ngendlela abasuke betshelwe ngayo. Kwesinye isikhathi akubhalwa laphandle ukuthi anathwa njani amaphilisi,” kutsho umakhelwane.
Okhulumela uMnyango wezeMpilo eKwaZulu-Natal uMnu Sam Mkhwanazi uthe: “UMnyango uyazi ngaloludaba futhi uyaxolisa ukuthi kwenzakele. UMnyango uzakwenza uphenyo. Uma kutholakala ukuthi kukhona obebudedengu uzathathelwa amanyathelo okuqondiswa.” — Ubulembu
Online Reporter