adminCornelius Luphahla
UDUBO lokuswelakala kwamabholoho lemigwaqo emangweni weBinga soluthwalise izakhamizi zakule indawo nzima nanko phela zithi njengoba isikhathi sezulu sesisondele sezizahamba umango ongaba ngamakhilomitha angu-30 zisiya ezilindweni zamabhasi.
Amabholoho afuna ukuvuselelwa ngeleManyanda kanye leleDatema elisemgwaqweni oya eKariyangwe.
Ukubhidlika kwamabholoho la kubikwa kubangela ukuthi amabhasi ahamba kulo umango ame ukuhamba nxa izulu selisina ngoba kuyabe sekuyingozi ukuchapha umfula njengoba uyabe ugcwele.
UMthunywa uvakatshele kule indawo wakhulumisana loMnumzana Michael Muleya oyisakhamuzi sakule indawo wachaza ukuthi ngesikhathi sezulu bahamba umango omude kakhulu besiyadinga amabhasi.
“Ngesikhathi sezulu sithwele nzima ngoba sihamba umango ongaba ngamakhilomitha angu-30 silanda izimota emgwaqweni weBinga ngoba amabhasi ayabe engasenelisi ukufika kule indawo ngenxa yokuswelakala kwebholoho kanye lomgwaqo omubi. Amabhasi ayabe esebanjwa ludaka kuthi emabholohweni amanzi ayabe esedlula phezulu yikho nje amabhasi ayabe esephelela khatshana,” kuchaza uMnu Muleya.
Esinye njalo isakhamuzi sakule indawo uNkosazana Allan Mudenda uveze ukuthi uhlupho olukhona ayisilo lwamabholoho kuphela kodwa lemigwaqo yakhona mibi.
“Noma nje amabholoho akule indawo efile kodwa lemigwaqo yakhona mibi. Lokhu kudala ukuthi amabhasi ahambela kulumango ahlale esifa. Ngikhuluma nje kukalutshwana ukuthi ibhasi ehambela kulumango ihlale iviki ingafanga,” kuchaza uNkszn Mudenda.
Induna yakule indawo enguSenetha njalo esabelweni seMatabeleland North, uSiansale ibikele intatheli ukuthi amabholoho afileyo mabili njalo angabangela ingozi.
“Amabholoho afileyo ngelisemfuleni uDetema lele Manyanda njalo alakho ukubangela ingozi enkulu. EleManyanda liyingozi enkulu ngoba selahlephuka eceleni selisenela imota eyodwa nje. Ngesikhathi sezulu imota ingawela emfuleni lo ngoba umgwaqo uyabe utshelela.
“Isicelo sethu yikuthi uHulumende angenele asivusele amabholoho la kanye lemigwaqo ngoba sihlala sibikela abakhangela ngokulungiswa komgwaqo bengenzi lutho,” kutsho uSenetha uSiansali.
UManjinela wemigwaqo esabelweni seMatabeleland North uMnumzana Mlawuzi ubikele intatheli ecingweni ukuthi ngeke akhulume lutho ngaloluhlupho.
“Mina ngeke ngikhulume lutho ngokufa kwemigwaqo eBinga ecingweni kodwa ngifuna ukulandwa ukuze ngikholwe ukuthi ngikhuluma lentatheli,” kuphetha uMnu Mlawuzi.
Online Reporter