Online Reporter
YiNtatheli kaMthunywa
AMAPHOLISA akuleli aqinisa umkhankaso wokulwisana lokuphathwa kwezikhali emadolobheni.
Kumkhankaso lo amapholisa ahlose ukubopha abantu abathwala ingqamu, amabhemba, amarekeni lezinye izikhali eziyingozi emphakathini.
Kumbiko okhitshwe ngamapholisa, umkhankaso lo obizwa ngokuthi “No to Knives in Pockets/Ingqamu Idingani Esikhwameni/Banga Rinodei Muhomwe” uqaliswe ngenhloso yokulwisana lobugebengu obufana lokubulala.
Amapholisa athe akhathazekile ngenxa yezigangi ezihamba zithwele izikhali endaweni zomphakathi ezifana lamabhawa, ama-night club, emigodini lasendaweni zokuhlala lapho ingxabano ezincane ezicina ziphenduka udlakela olukhulu.
Ngokutsho kwamapholisa, mhlaka 18 Nkwenkwezi 2026 kubotshwe abantu abangu-15 ngaphansi komkhankaso lo, okwenze inani lababotshiweyo lafika ku-346 kusukela umkhankaso lo waqala mhlaka 9 Nkwenkwezi lonyaka.
Amapholisa aphinde axwayisa uzulu ngokuphatha izikhali eziyingozi emphakathini, ebika ukuba akula sizatho esenza umuntu aphathe izikhali ezinjalo.
Uzulu ukhuthazwe ukuthi asebenzelane lamapholisa ngesikhathi sokuhlolwa kwabantu lokudinga izikhali, njalo abike labo abahamba bethwele izikhali eziyingozi.
Imibiko ingahanjiswa kuNational Complaints Desk ku-(0242) 703631, kuWhatsApp 0712 800 197 loba enkambeni yamapholisa esiseduze.
