Online Reporter
Ethel Ncube
KULENDODA yeChirumanzi egwetshwe ukuyapika ejele okweminyaka engu-20 ngemva kokubulala umkayo isithi ujola lomfundisi ngeviki ephelileyo.
UBrighton Khadhlanga (32) weChinyama Village, ngaphansi kwenduna uGambiza eGweru, ugwetshwe kuyonale iviki eGweru Circuit High Court. UKhadhlanga wabulala umkakhe uPatience Madula (26) emsola ngokuba lobudlelwano obungazwisisekiyo lomfundisi.
Isehlakalo lesi senzakala ngoZibandlela 20, 2025, ntambama emzini wabo. UKhadhlanga kubikwa wafika endlini evela eMaguma Business Centre wafica umkakhe ehlezi emkulwini, lomntwana wabo omncane kanye lomama omzalayo uVimbai Zhova.
UKhadhlanga waqalisa ukuthuka umkakhe emsola ngokujola.
Wamethusela ngokuthi uzambulala yena lomntwana wabo uClemence Khadhlanga, abesezibulala yena. UZhova wathatha umzukulu wabaleka.
UKhadhlanga wathatha isikhuni esivuthayo watshaya ngaso umkakhe kanenginengi emzimbeni wonke. Waphinda wathatha imbiza ye-aluminium wamtshaya kabili ekhanda.
UKhadhlanga watshayela umfowabo kaPatience ucingo, uIrvine Madula, ngo-11 ebusuku wamtshela ukuthi ufuna ukubulala udadewabo ngenxa yokuthi uyajola. UMadula wacela ukukhuluma lodadewabo, owamtshela ukuthi uselemvimvinya emzimbeni uyafuthelwa.
UMadula waqhatsha imota wahamba wayathatha amapholisa eMuchakata Police Base bahle baqonda emzini kadadewabo. Befika bafica umzimba kaPatience phansi esedlule emhlabeni. Isidumbu sathathwa sasiwa eUnited Bulawayo Hospitals ukuze kwenziwe i-post-mortem.
UKhadhlanga kubikwa wabaleka kodwa watholakala wabotshwa. Umbiko we-post-mortem owenziwa nguDokotela Gavilian Acosta wakhomba ukuthi imbangela yokufa kwakuyikulimala kobuchopho, ukulimala okukhulu ekhanda kanye lokopha ngaphakathi.
Umzimba ubulamanxeba amabili atshonayo ekhanda, amanye emathangazini womabili kanye lamanye emhlane lezingalweni.
