admin
YiNtatheli kaMthunywa
UKUNQOTSHWA kweqembu leTsholotsho FC kubangelwa yikuswelakala kwenkundla engeyayo, okudala ukuthi kubelendleko ezinengi eziphambanisa impilakahle yabadlali, kutsho uLizwe Sweswe.
Umqeqetshi weZiqholo zeZhwane lo ubike lokhu ezama ukuchasisa izizatho zokudlala kwabafana bakhe kumidlalo edluleyo. ITsholotsho ikhangelane lokuvalelisa iligi yePSL ngoba ihlezi kunombolo yetshumi lane kungalane.
Ekhuluma umbono wakhe ngokwenzakala kulithimu, uthe iziphathamandla labalandeli beTsholotsho kumele zibone ukuthi ziyaqedisa umsebenzi wokwakhiwa kwenkundla ezasetshenziswa yithimu.
USweswe ubonge kakhulukazi umsebenzi wokwakhiwa kwenkundla owaqaliswa nguSikhwicamfundo uJonathan Moyo kuminyaka emibili edluleyo.
UMoyo wakhokhela ukusekelwa kohlelo lokuthi kwakhiwe inkundla yenguqu ezasetshenziswa yiTsholotsho FC lamanye amathimu adabuka kulumango.
“Umphathintambo uMoyo sewakwenza okusemandleni akhe. Khathesi sekusalele kulabo abaphansi ukuthi basebenze. Angeke sithi umphathintambo aze eTsholotsho ukuzofaka isitina. Engikutshoyo yikuthi abantu kumele bakwazi ukuthi inguqu ayidlalwa mhla welanga lomdlalo kuphela.
“Ngiyambonga kakhulu umphathintambo uMoyo ngosizo ahlala esinikeza lona kuqembu. Abantu sebesuke bahlala phezulu kwezandla njalo sebefuna ukwenzelwa lokunye abangezenzela khona.”
Umqeqetshi lo uqhubeke wathi ngaphandle kokuthi iTsholotsho iqede ukwakha inkundla engeyayo, iphupho lokuphumelela kumidlalo yaphezulu lizatshabalala.
“Amanye amathimu afana leMutare City leBorder Strikers angcono kuleTsholotsho ngoba alenkundla zawo. Ukuba lenkundla engeyenu kunceda ukuthi ithimu ithole imali endaweni yokuthi sikhiphe imali le ezikhwameni zethu.
Ngenxa yokuthi iqembu lethu lihlala lidlala khatshana lasekhaya, kutsho ukuthi akusoke kubelula ukuthola imiklomelo esiyifunayo lokujabulisa abadlali labalandeli,” kubika uSweswe ebulenjini beTsholotsho FC kuliviki.
Isicelo sikaSweswe yikuthi izakhamizi lalabo abatshisekela ukuphumelela kweTsholotsho FC badinge iqhinga lokuthi kucentwe inkundla encinyane engasetshenziswa ukuthi iqembu lilolonge.
“Kungaba njani nxa singaba le-B -Arena lapho okuzalolongela khona iqembu. ngesikhathi siqhubeka ngokwakha inkundla yethu. Kumele sazi ukuthi umdlalo wenguqu ulibhizimusi.”
Umqeqetshi lo ngokungenisa kwakhe iTsholotsho ngo2015, wahle waqalisa izifundo zesithupha seCaf A licence njalo uqine ngokutshayela ihlombe abalandeli boqobo beTsholotsho FC ngosekelo abamnika lona esadalala lethimu emahlangeni kaDivision One.
USweswe uqale umsebenzi wokukhuza ithimu kuPSL encediswa nguSithethelelwe ‘‘Kwinji 15’’ Sibanda. Umsekeli lo ngowesifazane wakuqala ukuqeqetsha ithimu yabafana eZimbabwe.
Iziqholo zeZhwane zisebenzisa inkundla yeWhite City njengekhaya layo njalo kulapho ezilolonga khona nsukuzonke.
Online Reporter