OGULUVA ABABAMBEKI . . .IBantu Rovers ibizwa eGermany njalo

YiNtatheli kaMthunywa
IQEMBU leBantu Rovers lenza okwehlulekwa ngamathimu abizwa ngokuthi makhulu kunguqu yakuleli.

Kubikwa abadlali beBantu Rovers sebebizwa ngobunengi babo kumathimu aseMelika lase-Europe okutshengisa ukuthi umsebenzi wabaqeqetshi lenkokheli zalithimu uyabonakala.

Iphephandaba likazulu liphethe umbiko omqoka wokuthi iligi yeBundesliga eGermany iyasuthikela okumangalisayo ngabadlali abalolongwa liqembu leBantu Rovers. Lokhu ngokwesibili kulumnyaka iTshintsha Guluva ithola ukuphakanyiswa kanje.

IBantu Rovers liqembu elikuligi kaDivision One kumhlubulo ongezansi yelizwe.

Ngaphandle kweGermany, kulamanye amathimu khonale e-Europe ahalela abadlali beBantu Rovers.

Kubikwa asemanengi amathimu akulindawo acela ukuthi iBantu Rovers ithumele abadlali khonale.

Imbiko ephuma ebulenjini iveza ukuthi amathimu abalisa iBorussia Monchengladbach asekhulume kabanzi ngobungcitshi babadlali abavela kuBantu Rovers.

Inkokheli zeBorussia zabika ukuba sezizaqala ukuthenga abadlali beZimbabwe ngobunengi babo.

Omunye umdlali osenze izimanga eGermany nguMarvelous Nekamba oseke watshibilikela kweleMelika njalo.

UWilbert Sibanda oyisikhulumi seBantu Rovers ubikele iphephandaba likazulu ukuba lonyaka bakhangelele ukusebenzelana lamathimu amanengi eGermany.

“Abafana bethu lokhe besiphakamisa kwamanye amathimu phetsheya. Iqembu leBantu Rovers liyajabula ukuthi ubungcitshi babadlali bethu buyabonakala lakumazwe aziwa njengentshantshu zomdlalo.

“Sikhuluma nje amathimu eGermany ayafona ebika ukuthi sithumele abadlali bethu khonale.”

Kusenjalo, iTshintsha Guluva ibike ukuba ayibuyeli emuva ngokuzimisela ukuthi ibephambili kumncintiswano wokuphenduka kuligi yePSL.

Ngokutsho kukaSibanda imiklomelo yelogu ayitsho lutho kubo ngoba lakusizini edluleyo ithimu le yayikusimo esifanayo.

“Sihlose ukuthi siphenduke kuPSL. Abanye bathi asisoke senelisa kodwa thina sikholelwa ukuthi isimo sizatshintsha.

“Nxa bethi iBantu Rovers izabulawa abazi manje ukuthi lathi sizawabulala amanye amathimu.”

Loba uSibanda ethi kayisoke ibulawe, kulabanye abalandeli bayo abathi sekuphelile ngalithimu.

Okusegcekeni ngomdlalo walithimu yikuthi iphupho likaMethembe Ndlovu elokuphakamisa inguqu yakontuthu selibonakala.