Online Reporter
Ngeviki ephelileyo bekulemidlalo etshiyeneyo esigabeni sakithi egoqela ekanobhutshuzwayo, ukugijima, lebhola lokuqaga.Bekuthengiswa ukudla lokunathwayo okwehlukeneyo, kudingwa kumbe ngithi kukhankaselwa imali yokwakhiwa kwezindlu zababalisi esikolo sakithi.
Ngabona amajaha amathathu edakwe aze alala amanqetshane phansi enhlabathini, begiqika okukababhemi osuthi amajodo lamakiliwane.
Ngabayekela utshwala baqala baphela ekhanda, ngasengibalanda ngelanga elilandelayo ngibabuza ukuthi badakwa baze balale okomuntu ogulayo, impendulo zabo zaziphose zihambelane noma nje zazitshiyana kancane. Bakhala ngokuthi okunye okwenza badakwe bazikhohlwe yikuthi kabalamsebenzi.
Esinye isizatho bathi inkinga imideni eminengi akusela lokhu okuthiwa ngolimi lwabondlebe zikhanyilanga yi-family tree.
Uthola umntwana akhule aze abe yinkalakatha yendoda engazi umalumakhe kumbe uyisekazi, phela ensukwini zayizolo yibo akade kusithi kungaba lobunzima obuthize ubethulele labo bakweluleke ngendlela eqondileyo ezakutshiya ubethwa ngumoya, uzizwe wethulwe ijogwe.
Bathi yikho okwenza bacina bedanela kuzidakamizwa ezifanana labonjengu labombanje ngoba bathi nxa bangadakwa bayakhohlwa ngenhlupho abaphakathi kwazo bazijabulele.
Lamantombazana lawo ngokufanayo, akhala isililo sinye, bathi obabakazi abasabazi ukuthi babethulele indaba ezibaphicayo empilweni zabo okwenza inengi labo libhudlukele phakathi kwezinkinga ngokungazi.
Phela lowu sokungumkhuhlane phose welizwe lonke, uthola ontanga bedakiwe begiqika okomthanyelo welala, isanyongwana sithanyela egumeni silungiselela umtshado.
Ngendlela inengi lentsha edakwa ngayo langendlela abaziphatha ngayo kungaswela obelulekayo eminyakeni elitshumi elandelayo lelilizwe liyophenduka kompunzi idla emini kumbe komhlambi kazalusile.
Ayixabene
