Online Reporter
Izolo ngisakhula sasisithi singaqeda ukusenga, sakleza siphume lazo inkomo size siyephenduka selisiya ngomutsha wendoda. Minengi imidlalo esasitshona siyidlala ebalisela ukuqwaqwazana ngemiqwayi, ukuzingela, ukuthiya amajuba lokuzwana amandla, ingqwele yayikhetha abantu ngababili efuna ukubaxega benzelwe amabele amabili kuthiwe ozaqala ukudiliza kutsho ukuthi uzimisele ukulwa besekuqala-ke.
Kwakungadojwa godo kumbe ilitshe, kwakuqondwana ngezibhakela zitshe indoda ize ivume ukuthi yehlulwe kube sokulanyulwa, langekhaya kwakungakhulunywa ukuthi usibanibanyana utshaywe nguzibani, kwakuphelela khonale emadlelweni. Lamhlanje into zijikile, abafana bakhathesi inengi labo nxa kuthiwe balwile bahloma baphelele njengamalwa ecatsha uthola belengqamu, amabhemba abanye bathwala sibi senkafulakufa.
Ngiyake nginanzelele ikakhulu endaweni zokuzithokozisa ezifanana lemabhawa nxa kuvuka ingxabano uzakuthi usalibele ubone sejuluka igazi omunye esegwaziwe ngengqamu, kumbe esedobhe inkalakatha yembokodo afune ukucobodisa omunye.
Ngesikhatshana uzabona sokulamapholisa sekubotshwa abantu. Thina yayikhala inqindi ungasoze ubone muntu ejuluka igazi ngaphandle kokuthi nxa umuntu ethe watshaywa emakhaleni waphuma umungula.
Ingqwele yayiwumisa umdlalo ungaphela kuqalwe phansi kuze kutholakale intshatshu, wawungeke uzwe sekuze kuthiwa kucine kufika enkambeni.
Khathesi angazi ukuthi inengi lentsha selangenwa yimpehlani bani emakhanda nxa bezikwejisela ezindaweni zokuthokozela, kukanengi sibala kumaphephandaba kumbe sisizwa emisakazweni lakubomakhalekhukhwini ukuthi ontanga bagwazane omunye wacina esedlula emhlabeni.
Kuviki ephelileyo esigabeni sakithi bakhona abafana ababulele umngane wabo ngebhemba, ngikhuluma nje basejele, into edanisayo njalo ezwisa ubuhlungu yikuthi ngabafana abancane, inkakhayi zabo zisebuthakathaka abalalalutho.
Abazali yibo asebethwala nzima ngokukhokha izimali zamafayindi lokukhokhela indleko zomngcwabo.
Khonapho kuthe kuphenyisiswa kudingwa ukuthi besekutheni baze babulale umngane wabo kwatholakala ukuthi bekubangwa umhlanga wegwayi akade bewubhemisana, thina sasitshona sidlala imidlalo efana lebhola lokuncintisana sigijima sasiqinile uthi ungakhangela izigcuma zethu kwakungani ngezebutho likaTshaka.
Abakhathesi inengi labo liyaxega, mhlawumbe yikho okwenza bacine sebesilwa ngezikhali. Ayixabene.
