Online Reporter
Silo Mehleli Dube
ISIKHATHI esinengi kuvuka ukhophe phakathi kukamamazala lomalukazana akhohlwe umamazala ukuthi laye kulowo mdeni aseqedele ithumbu laye wake waba ngumalukazana, wemukelwa ngezandla ezimbili.
Ngikhumbula omunye umngane wami wathi esethethe, unina akumjabulisanga ngoba ethi indodana yakhe yayingakabi lesikhathi ithole umsebenzi njalo wayengakayikholisi imali yomntanakhe, wayesafuna ukuthi amthengele lokhu lalokhuya njalo afundise labanawakhe njengoba wayesebhujelwe ngumkakhe.
Wahlala ehlulukelwe umntanabantu ekhunjuzwa ukuthi wafika kuleli khaya ezacile khathesi wayesezimukile esefaniswa lonanane.
Babengakakhi umuzi wabo ekhunjuzwa njalo nje ukuthi umuzi lo wawubiza yena umamazala ewakhe ngezandla zakhe. Laye ujaha kwakumkhathaza ngoba umkakhe wayehlezi ehlulukelwe ehlengezela izinyembezi ngenxa yenkulumo zikaninazala. Ngomnyama wahlala phose iminyaka emibili engakatholi inzalo athi esethetha uninazala athi umalukazana wakhe yinyumba eyaqila indodana yakhe njalo angabe sewabhoda amaguma amanengi, kwesinye isikhathi uzwe ethi ukuswela inzalo kungabe kwabangelwa yikuthi wayekhupha izisu kuyikuzama ukuthi amhlukuluze aze afulathele. Kwesinye isikhathi aze athi ngabe indodana yakhe yazithathela uZibani banyana eqamba amabizo amantombazana esigabeni, umalukazana laye waze wantunya kwakuhlala kungutshiki lobhanqa.
Umuntu owayesebunzimeni ngujaha ngoba unina wayemthanda lomkakhe emthanda ngoba ekhethwe yinhliziyo yakhe, kwakuthi kuthunyelwe impahla ezivela edolobheni kumkakhe wayezilanda umalukazana esilindweni samabhasi engavunyelwa ukuthi azivule zazivulwa nguye uninazala uqobo lwakhe, ngelinye ilanga indodana yakhe yahamba lomkayo edolobheni, yabe isiwuchithile umuthi inkonyane ngoba ethi selande ukuyaqeda imali yomntanakhe esikhiweni.
Banengi omalukazana abazithola bekulesi simo. Ngikhumbula omunye umalukazana owaphendula uninazala emtshela ukuthi yindodana yakhe ayithwala esiswini sakhe okwenyanga eziyisitshiyagalo lunye kukanti laye umalukazana wayephendula esiyale esithi ngumkakhe.
Nxa ungumamazala owakhahlanyezwayo mhla ufika kwenuzala ungaze waloyisa ukuthi ukwenze kumalukazana ozathathwa yindodana yakho, kodwa kumele umthande umamukele ngoba ezoqhelisa imuli ngoba lingekela ukuzwana licina licabangelana lobuthakathi.
Kweminye imizi labazukulu abavunyelwa ukuvakatshela kogogo ngenxa yengxabano zikamamazala lomalukazana. Ayixabene.
