Online Reporter
Innocent Kurira
UMDLALO we-basketball koBulawayo ukhangelelwe ukuthi usabalale, ukhule lakundawo lapho obungadlalwa khona, kuphakanyiswe abadlali besifazane labasakhulayo.
Lokhu yikho okuhloswe ngabakhokheli abatsha benhlanganiso ephethe lumdlalo esabelweni, eyeBulawayo Basketball Association (BBA).
Umongameli weBBA uSinda Mono ubiselwe esikhundleni, okutshengise ukuthi amalunga omdlalo alokukholwa lokwethemba kubukhokheli bakhe.
Ekhuluma lentatheli yeZimpapers Sports Hub, uMono uthe iqula elitsha kubukhokheli beBBA lizaqinela ukufaka umfutho kuzo zonke inhlelo zomdlalo. Uthe okumqoka yikuthi bakhuthalele ekuphakamiseni abadlali besifazane, kulandelwa uhlelo lwe “Her World” oluqhutshwa yinhlanganiso yeFiba.
“Okwakuqala, ngithanda ukubonga bonke abakumdlalo we-basketball ngokungethemba ukuthi ngibakhokhele,” kutsho uMono.
“Le yithemu yami yesibili ngisesikhundleni njalo ngifuna ukutshiya ilifa elizavulela ukuthi abesifazane abanengi baphatheke kulumdlalo.
“Okwakhathesi sileligi yesithathu elamaqembu amanengi abesifazane. Ngomnyaka odluleyo saqeqetsha onompembe abalitshumi lambili, ngakho sifuna ukwengeza kulokhu.”
Inhlanganiso yeBBA itshengise ukuba iyenelisa ukuqhuba ngempumelelo imidlalo ye-Zone Six Afrobasket qualifiers njalo isikhangelele kuligi yelizwe eka2026.
Loba ikhangelele ukwenza kuhle, iBBA ikhalaza ngesimo esibi senkundla kwenye impahla yokuqhuba umdlalo ngemfanelo.
Unobhala omutsha weBBA uTino Gumbo uthe bazaqinela ekusabalaliseni umdlalo kwabasakhulayo.
“Inhloso yethu yikwakha ubudlelwano obuqinileyo lezikolo ukuze umdlalo ubelempande,” kutsho Gumbo.
Okunye okuhloswe ngabakhokheli laba yikuthi ithole isivumelwano esengeziweyo sokusebenzisa inkundla yeKhanyisile Sports Centre. Inkundla le ngeyekhansili yakoBulawayo.
“Kasila inkundla engeyethu. Ngomnyaka odluleyo eminye imidlalo yethu yaqhutshelwa esikolo se-Eveline High ngenxa yalokhu. Sesifake isicelo kukhansili yakoBulawayo ukuthi iseboleke inkundla yeKhanyisile Sports Centre, silethemba lokuthi bazasipha, siyisebenzise njengekhaya lethu.
“Sifuna njalo ukuthi imidlalo iqhutshwe lasemalokitshini lapho okulethalenta elisahluma, elidinga ukusekelwa,” kutsho uGumbo.
Amalunga equla labakhokheli abatsha kuBBA: Admire Chafa (Technical), Tanaka Masarirambi (Treasurer), Andile Chirinda (Competitions), Zanele Nzima (Women & Youth), Simbarashe Musodza (Athletes Rep), Farai Mapuvire (3×3 Basketball), loMaurice Mazhandu (Marketing).
