Online Reporter
Nkosilathi Sibanda
AMAPHOLISA eZimbabwe Republic Police (ZRP) aqinise umkhankaso wokulwisana lokuthengiswa kwezidakamizwa ngemva kokubopha abantu abahlanu ngamacala ehlukeneyo eBeitbridge, lapho okutholakale khona inqwaba yembanje lezinye izidakamizwa ebezifihlwe ngobuqili.
Amapholisa aveze ngempelaviki ukuthi abophe isizalwane seSouth Africa uMthokozisi Patrick Hlophe (46), uTapiwa Dube (38) loDalubuhle Sibanda (41) ngemva kokubanjwa besemgwaqweni weBeitbridge-Bulawayo ku-60km peg.
Abathathu laba batholakale bethwele i-120,244 kilogrammes yembanje emoteni yohlobo lweNissan Hardbody Double Cab, elenombolo ezithi XVD 354 GH.
Kwesinye isehlakalo, amapholisa aphinde abopha uVenancio Muchazondida (41) eBeitbridge Border Post ngemva kokutholakala elemabhokisi angu-48 ezidakamizwa lezinto ezingekho emthethweni ezilinganiselwa ku-US$12 000.
Kubikwa ukuthi izidakamizwa lezi bezifihlwe phakathi kwamabhokisi eMaq washing powder zagoqelwa ngamapulastiki amnyama ngenjongo yokubalekela ukuhlolwa ngamapholisa kumngcele weBeitbridge.
Amapholisa aphinde athatha imota yohlobo lweNissan Elgrand, elenombolo ethi ADG 3066, ebisetshenziswa ukuthwala izidakamizwa lezi.
Isikhulumi samapholisa elizweni uCommissioner Paul Nyathi uthe ukubotshwa kwabantu laba kutshengisa ukuthi amapholisa aqinise impi yokulwisana labathengisa izidakamizwa.
“Sesiqinise umsebenzi wokudinga lokubopha bonke abathengisa izidakamizwa elizweni. Umthetho uzakwehlela bonke abangena emisebenzini yokuthengisa izidakamizwa.
“IBeitbridge ngenye yezindawo esizikhangele kakhulu ngenxa yamaqembu ezigebenga azama ukusebenzisa umngcele ukungenisa izidakamizwa elizweni,” kutsho uComm Nyathi.
Uthe amapholisa azaqhubeka ehlasela indawo okusolwa ukuthi kugcinwa khona izidakamizwa lokuhlola emigwaqweni emikhulu ukuze kubotshwe “ama-drug lords” lamaqembu abo.
“Sifuna ukwazisa uzulu ukuthi iZRP izimisele ukuqeda wonke amaqembu athengisa izidakamizwa. Sizakhuphula ukuhlasela emadolobheni asemngceleni, emigwaqweni lasemalokitshini lapho okucatshangelwa ukuthi kulemisebenzi yezidakamizwa,” kutsho yena.
Ukubotshwa kwabantu laba kuza ngesikhathi uHulumende lamapholisa beqinisa imikhankaso yokulwisana lokusetshenziswa kwezidakamizwa.
IBeitbridge isilokhu ibalwa phakathi kwendawo ezisetshenziswa kakhulu ngabathwala impahla ezingekho emthethweni ngenxa yokuxokozela kwabantu lezimota ezingena ziphuma phakathi kweZimbabwe leSouth Africa.
Amapholisa anxuse uzulu ukuthi ancedisane lawo ngokubika abantu abasolwa ngokuthengisa izidakamizwa ukuze kuqedwe umkhuba lo osubhidliza impilo yentsha lemuli ezinengi.
