Online Reporter
Thina izolo sisakhula sasikwazi ukuthi impucuko ithutsha ivelela emadolobheni, wawuthi nxa uvela edolobheni abantu basemakhaya bakuthathele phezulu bakholwe noma yini obatshela yona lalapho usuwahutshuza amanga aluhlaza tshoko angabikhona ophikasana lawe ngoba kukholelwa ukuthi abemakhaya abazi lutho kukomnyama ubambile.
Zonke izinto ezinhle kwakuthiwa zivela khona. Kuthe ngokuhamba kwesikhathi abantu sebegcwala emadolobheni abanye besiyadinga imisebenzi njalo kuhlangana imihlobohlobo yabantu baqala ukukhala ngokubhidlika kobuntu ngoba sekulemikhuba engajwayelekiyo enziwa ngabantu.
Baqala abanye ukuhlala ezitaladeni ngenxa yokuswela indawo zokuhlala, abanye njalo sebelala ngaphansi kwamabholoho baqala imithanithani yokubamba abantu abavukela emisebenzini lezibhedlela ukuyabona abagulayo inkunzi.
Emakhaya lakho kwezinye izindawo sokwabanjalo akusahanjwa ebusuku. Kudala kwakusesatshwa imikhoba lamathonga manje lamhlanje sekusesatshwa umuntu.
Zikhona indawo esezilamabhawa aphuza ukuvalwa.
Amanye avalwa empondo zankomo kuthi nxa esevaliwe abantu sebesiya emakhaya uzwe omunye evuka ekhala ngokuthi bamkhuthuze umakhalekhukhwini lemali, khona kwamanye amakhaya angcelelane lamazwe anjengabo South Africa njengesabelo seMatabeleland ontanga sebaphenduka okeketani kumbe mhlawumbe bakufunda khonale eGoli okubanjwa umuntu inkunzi libalele lithe bha.
Kuthi otsheketsha bona bayahlahlelana ngamabhemba kubangwa yona imali kwesinye isikhathi sokubangwa omahotsha balimazane kube ngokunye. Ubudlwangudlwangu sasibuzwela emadolobheni. Abanye ngabatholakala begwazwe bafa emabhawa wonala asephuza ukuvala.
Konke lokhu kudala kwakungekho ngoba nxa wawungathi utshayisa ebhawa empondo zankomo uyabe uzakwenza sikhathi bani imisebenzi yangekhaya efana lokulima lokunye nje okutshiyeneyo.
Lokhuyana esasikujwayele ukuthi inengi labantu abahlala emakhaya bathambile akusekho lokho kwezinye izindawo ungehla ibhasi ebusuku bangazenza angani bayakuthwalisa impahla bekuphelekezela bathi sebephambili baqambe inkalakatha yemali nxa uthi awulayo bahle bakukhuthuze mhlawumbe izibindi lezi bazinikwa yizidakamizwa labonjengu sebedala imbedumehlwana ezedlula ezemadolobheni lapho esasikwazi ukuthi kukomtshaye aze afe ngoba engisisihlobo sakho.
Emavikini ambalwa adlulileyo kwesinye isabelo sakithi asazi kumbe yilabo asebedudulwe eGoli bangenele omunye ugogo okade kusanda kulotsholwa umzukulu wakhe ngenye indoda esebenzela kweleMelika bambamba bambopha izandla bathatha yonke imali lempahla qede lapho bamdlwengula yindaba nje esaphenywa ngamapholisa.
Sithithibele isigaba ngoba yizinto akade sizizwa ngelikabathi singaziboni ngamehlo.
Ayixabene.
Bongani Ndlovu