Online Reporter
Fungai Muderere
ABAFANA beScottland bazagada indizamtshina okwesibili phakathi kwamalanga ambalwa beqonde koBulawayo.
Khathesi balande ukuzadlala leChicken Inn, kumdlalo weligi yeCastle Lager Premier League, eBarbourfields ngoLwesihlanu.
Izethekeli ziphenduka koNtuthu, zisanda kukhitshwa kuChibuku Super Cup yiHighlanders.
Ukuhlelwa komdlalo lo kudanise abalandeli benguqu abanengi, nanko bebecabangela ukuthi uzabe ungoMgqibelo kumbe ngeSonto.
Bakhale kakhulu abaphathi beChicken Inn ngalokhu.
“Besifuna ukudlala ngempelaviki ngoba iHighlanders izabe ingekho ekhaya. Kumdlalo odlalwa phakathi kweviki lapha koBulawayo kufuna kungoweBosso ngoba ibukelwa ngabantu abanengi. Kodwa singathini njengoba sekuhleliwe,” kutsho isikhulumi seChicken Inn uNkululeko “Khuliyo” Nkala.
Abalandeli beChicken Inn labo bayakhala.
“Kambe abasihloleli pho abaphathi beligi? IScottland angithi yithimu okuthiwa idonsa abantu, pho kuzaphumani esikhwameni nxa kuzabikwa ukuthi sesizadlala layo ngoLwesihlanu. Abantu kabasoke bangene ngobunengi. Aluba basibuyelise eLuveve, kungabangcono,” kutsho uDingani Dube, ohlala eMbundane, ongomunye wabalandeli beChicken Inn.
Umlandeli omkhulu uMcCloud “Moyez” Moyo uthe: “Akulandaba, sizabatshaya kunjalo. Esikhala ngakho yikuthi besikhangelele ukuba lababukeli abanengi. Abaphathi beligi bayazi ukuthi amaqembu athola imali ngabalandeli ababukela imidlalo. Kumdlalo wethu lo, akulanto esizaphuma layo ebambekayo. Okwethu kuzamele kube yikuzimisela ukunqoba.”
