admin
YiNtatheli kaMthunywa
UMQEQETSHI weSuperSport United, uKaitano Tembo, uthe lide ibanga elisazohanjwa kumbango wesicoco seDStv Premiership ka-2021/22 ngaphambili kokuthi kucace ukuba yiliphi iqembu elizaphakamisa inkezo le.
Njengoba amaqembu amanengi asedlale imidlalo eyisithupha, intshantshu, iMamelodi Sundowns, zihamba phambili ngemiklomelo engu-16. AmaSandawana, angakadliwa kulisizini, asesinqobe amahlandla amane elandelana isicoco seligi kodwa uTembo ukholwa ukuthi manengi amaqembu aqine ngokwaneleyo ukuthi alwele lesi sicoco.
“Kungumsebenzi wawo wonke amaqembu kuligi le ukuqinisekisa ukuthi isezingeni eliphezulu njalo alikho iqembu elizenzela umathanda njalo,” kutsho uTembo.
“Kusesekuseni ukuthi singaqamba iqembu elizanqoba ngemva kwemidlalo eyisithupha kuphela.
“Bunengi ubunzima obulinde wonke amaqembu. Kulemidlalo eminengi engakadlalwa. Angiboni ukuthi sekuyisikhathi sokuthi iSundowns ivele inikezwe isicoco. Njengoba kusazadlalwa imidlalo eminengi.”
Iqembu likaTembo liyiqale kahle isizini.
Uthe kunengi asekubonile abakwenza ngcono kulangesizini edluleyo.
“Sisadlale imidlalo eyisithupha kuphela kodwa sesikwazile ukuhlohla amabhola ayisitshiyagalombili, sangenelwa ngamabili kuphela. Kungcono kakhulu uma uqathanisa lesizini edluleyo,” kuqhuba uTembo.
“Ngesizini edluleyo ngicabanga ukuthi besitatazela emuva, kulokhu sibukeka siqinile njalo lokho kuyasivumela ukuthi sihlasele ngokukhululeka. Silabadlali abanengi abakwaziyo ukuhlohla, asikhangelanga umdlali oyedwa loba ababili kuphela.
“Kusahamba kahle kodwa kumele sikhangele umdlalo ngamunye. Kuhle ukuthola imiklomelo kuselesikhathi kodwa esikuhlosileyo yikwenza ngcono kulesizini edluleyo.”
Online Reporter