Online Reporter
Iziqu zobumnini
Izivumelwano zobumnini zingasetshenziswa leziqu ezilandelayo:
Eziqwini ezivela emabizweni: Inkomo yomdomeni ifile. (ya +umdomeni). Izitsha zabafana zisemkulwini. (za+ abafana).
Unkamisa wesakhi sobumnini ulumbana lonkamisa osekuqaleni kwebizo.
Eziqwini zobumnini kanje: Isisu sakho siyakhala. (sa +-kho). Abantwana bakhe abahloniphi. (ba- +-khe).
Ezabizwaneni ezithile: Izigqoko zalabo (za- +-labo) azikapheli.
Isisu salo (sa- +-lo) sincane.
Ezandisweni: Abantu basedolobheni (ba-s-edolobheni) sebelima umuntu. Izigodo zaphandle (za +phandle) zibaziwe.
Indlela okusetshenziswa ngazo ubumnini
Singasebenzisa ubumnini ukutshengisa ukuthi into ethile yenziwe ngani kanje: Ingwane yelala uyithengile. Imota yencingo idlaliswa ngumfana.
Singasebenzisa ubumnini ekuchazeni ukuthi ulutho lusebenza ngani. Isitimela sikagetsi siyagijima. Isigayo sedizili siyachola.
Singasebenzisa ubumnini ukuchaza ukuthi ulutho oluthile lusetshenziselwani: Izigqoko zomtshado sezithungiwe. Izicathulo zebhola zibhobokile. Uchago lomcaba seluvuthiwe.
Singasebenzisa ubumnini ukuchaza isikhathi sokusetshenziswa kolutho. Bahlabele ingoma yesonto. Izingoma zempi zimnandi. Ubumnini bungasetshenziswa nxa kuchazwa okuphethweyo. Ubulele inkomitsho yetiye. Isaka lamazambane seligcwele.
Ubumnini bungachaza ubulili: Abantu besifazana sebebusa. Ubumnini bungasetshenziswa ekukhombeni ukulandelana kwezinto: Le yinyanga yesibili yomnyaka. Lo ngumntwana wokucina.
Ubumnini bungasetshenziswa nxa kufanekiswa: Lowo yimvu yomuntu ngokulunga.
