Online Reporter
Nkosilathi Sibanda
UMPHAKATHI weSawmills, eMguza, esabelweni seMatabeleland North, usele uthithibele ngemva kokubulawa kwabantu ababili endaweni yamabhizimusi yeSiqongweni Shops ngoLwesihlanu olwedluleyo.
Imuli zabafileyo sezikhuphe isicelo emphakathini ukuthi uncede ngamacebo ekubotshweni kwabasolwa ekubulaweni kukaQedisani Ndlovu loKholisani Tshuma.
Kubikwa ukuthi uZibusiso Dube loSimphiwe Ncube basolwa ngokuhlasela laba ababili ngesikhathi kulengxabano emavinkilini abizwa ngokuthi kuseSiqongweni, eNyamandlovu.
Ngokutsho kwababekhona kunye lezihlobo zabafileyo, kusolwa ukuthi kwaba lokulwa phakathi kwabantu laba, lanxa imbangela yakho ingakacaci. Kuthiwa ngesikhathi sokulwisana, omunye wabasolwa wanqoba kulokho kulwa wasehlasela ababili laba okubangele ukuthi balahlekelwe yimpilo.
Esinye isihlobo sabafileyo, esikhulume loMthunywa ngocingo ngoLwesithathu, sithe umdeni udabukile kakhulu ngokulahlekelwa ngabathandekayo babo.
“Silokhe sisemalilweni ngenxa yokulahlekelwa ngabafowethu uQedisani Ndlovu loKholisani Tshuma ababulawa ngoLwesihlanu eSiqongweni Shops lapha eSawmills,” kutsho owesifazane lo oyisihlobo.
Uthe umngcwabo kaQedisani Ndlovu ubuhlelelwe ukuba ngoLwesine esiqintini seThokozani eduzane kweJimila eTsholotsho.
“Sizwe kuthiwa batshayene nje, kwaba lokulwa. NgoLwesine sibeka uQedisani esiqintini seThokozani eTsholotsho.”
Lesi sihlobo siveze ukuthi imuli kamsolwa uZibusiso Dube isiphathise ngemali yesililo engange-US$500.
Lanxa kunjalo, imuli ithi ayikatholi ukuthula ngoba abasolwa abakabotshwa kusukela kwenzakala isehlakalo lesi.
Amapholisa eMatabeleland North abengakakhuphi umbiko osemthethweni ngesikhathi sokulotshwa kwendaba le.
Imuli zabafileyo sezisabalalise imilayezo ezinkundleni zokuxhumana zicela uzulu ukuthi aphathise ngolwazi olungakhokhela ekubotshweni kwabasolwa.
Kumlayezo lo, osusabalale kakhulu kuWhatsApp, esinye isihlobo sabafileyo sinxuse uzulu ukuthi asebenzelane lamapholisa. “Ngithumela lumlayezo ukwazisa ukuba umuntu lo uvuke izolo ebulele abanawami ababili. Qede lapho wabaleka.
Khathesi udingwa ngamapholisa eMguza, eSawmills,” kutsho isihlobo lesi kumlayezo.
Siqhubeke sathi: “Sicela wonke umuntu abeke kumaqoqo akuwo kuSocial Media ukuze abanjwe lumuntu.”
