Online Reporter
IZAKHAMIZI zeGohole laseNumber 10 eManama kuWard 17, eMatabeleland South sezihlalela evalweni ngemva kokuhlaselwa yimpisi okwamalanga amabili elandelana.
Impisi le kubikwa ingene emizini yezakhamizi kumalanga ambalwa edlulileyo. Kubikwa lokuthi ibulele yadla imidlwane, inkukhu, ingalukhuni lembuzi emzini etshiyeneyo.
Isimanga, impisi le isuke yahlafuna lezicathulo zakulezinsuku, ama-crocs akade etshiywe phandle emnyango wendlu komunye umuzi.
Ngokubika komsakazo weNtepe-Manama FM, usobhuku weGohole uMnumzana Rorisang Nare uthe uyalwazi udaba lwempisi le.
“Umbiko engiwuzwayo uyangimangalisa kakhulu. Impisi le ingena phakathi komuzi, ibulale imbuzi, inkukhu, ingalukhuni iqume amakhanda.
“Engikwaziyo impisi ingazwa umnuko womuntu loba ihamba ngendlela iyabaleka,” kulandisa uMnu Nare.
Enye inkokheli yesiqinti seGohole uNkosikazi Sandisiwe Nkomo ubike ukuba behlelwe yisehlakalo esesitshiye izakhamizi zithithibele.
“Impisi isihlasele lapha emakhaya. Isimanga iyangena emizini ilwisane lezinja, ibulala isidla imbuzi, inkukhu, imidlwane, ingalukhuni lokuhlafuna lezicathulo.
“Lokhu kwaqala kunyanga ezedluleyo lapho omunye ubaba weHalisupi elinyazwe yimpisi eselusa imbuzi zakhe emini. Asisakwazi ukuthi yiyo le kumbe zinengi. Sicela ababona ngokugcinwa kwenyamazana zeganga basincedise ukuzisusa ngoba impilo zethu lezifuyo sekusengozini,” kubika uNkkz Nkomo.
Esinye isakhamuzi seKhongongo eGohole u-Admire Dube ubike ukuba udlelwe imidlwane yakhe.
“Ngidlelwe imidlwane emihlanu yimpisi le.Impisi yakhona iyalwisana lezinja ayizesabi. Iyingozi kakhulu abantwini. Impilo zabantu sezisengozini. Sicela usizo.”
Ugogo uRegina Sibanda oweGohole eNumber 10 ubike ukuba imbuzi yakhe yabulewe yimpisi le.
“Imbuzi yami yabulewe yimpisi, yayidla nje okungatsho lutho. Isimanga ithe isuka esibayeni yaqonda ekhaya. Iasibaya sami siseduzane lomuzi yangena ngesango lomuzi yabhoda iguma lonke. Yasuka yadla lamanyathela omntwana ayetshiywe phambili kwendlu. Asikaze sikubone lokhu.”
USikhangele Moyo uthe: “Impisi le ibulele inkukhu lengalukhuni zami, iquma amakhanda. Savuka sibona ekuseni,” kubika uNkkzi Moyo.
Ukulwisana kwenyamazana zasendle labantu esabelweni seMatebeleland South yinto esibhahile lapho ubaba oweHalisupi elunywe yimpisi yamliza kakubi kunyanga ezedluleyo.
