Online Reporter
Innocent Kurira
IBULAWAYO Chiefs isicacise indaba yayo yokuthi izafuna ukuphenduka kuPremier Soccer League, nanko isinqobe kathathu imidlalo ilandelana kuZifa Southern Region Division One.
Iqembu leli, eliqeqetshwa nguMaxwell Jongwe, linqobe iBosso 90 nge-1-0 eLuveve Stadium ngempelaviki edluleyo. Kuhlohle uPanashe Shoko ngomzuzu wesi-26. Ukunqoba lokhu kukhuphule iChiefs yaba esiqongweni ngemiklomelo eyisitshiya galolunye emidlalweni emithathu. Kayikahlohlwa.
IChiefs ingabe isifuna ukubaleka lemiklomelo kodwa ilandelwa yiHwange esilemiklomelo eyisikhombisa ngemva kokunqoba iZebra Revolution 5-0. Iqembu leTalen Vision liza lazo nanko litshaye iMainline nge 6-1.
Ukuqala kakuhle kweBulawayo Chiefs kuze kulandela “ukudilizwa” kweqembu njengoba beseliqala phansi sekusuke abanye abadlali uLucky Ndlela, Mduduzi Maseko loMigoz Svinurayi, kwasala abayisitshiya galolunye kuphela.
Lingene emkambo leliqembu lathola umdlali wasesiswini uKelvin Madzongwe ovele kuZebra Revolution, uTatenda Ushe owahlohla amabhola angu-15 ngesizini edluleyo, u-Arthur Musiyiwa owayekuDynamos, imvimbi uMalvin Mkolo esuka kuSimba Bhora, unozinti uMatripples Muleya kuTelOne lezinye imvimbi ezimbili uPolite Mwenda (Arenel) loGabriel Dlodlo.
Iqembu lihlanganisa abadlali abatsha labadala njalo kukhanya lihlose ukuthi libuthe konke okukhona kuDivision One kulisizini. Kweminye imidlalo, iBlackrock inqoba iBulawayo City nge 1-0. ICasmyn itshaye iMegawatt 2-0.
Impumela yemidlalo:
Talen Vision 6-1 Mainline, Hwange 5-0 Zebra Revolution, Blackrock 1-0 Bulawayo City, Eagle Life 1-0 Bulawayo Warriors, Imbizo 0-0 Nust, Bosso 90 0-1 Bulawayo Chiefs, Casmyn 2-0 Megawatt.
