Online Reporter
Ethel Ncube
KUFE abantu ababili kungozi yomgwaqo ngoMvulo, eGweru ngemva kokuba imota ingqikile isihlahla ngesikhathi ibalekela ipholisa ebeliyigijimisa.
Ingozi le yenzakale ebusuku ngemva kwehola letshumi lengxenye emgwaqweni owedlula eBristol elokitshini leMkoba 11.
Kuzwakale ukuthi umtshayeli wemota yohlobo lwe-Toyota Aqua wayetshayela wasegijinyiswa lipholisa elitholakale ukuthi nguConstable Sakala weZRP Mkoba okuyikho okwabangela ukuthi acine esiyatshayeka esihlahleni kwafa ababili ababelapho.
Kusitatimende esikhitshwe yisikhulumi samapholisa elizweni uCommissioner Paul Nyathi uthe amapholisa asachwayisisa.
“Njengamapholisa siqinisekisa uchwayisiso olwenziwayo ngecala lengozi ebulele abantu eyenzakale emgwaqweni uBristol mhlaka 28 Mabasa ngezikhathi zika 2230 hours lapho abantu ababili akade begade iToyota Aqua abafele lapho okwenzakale khona ingozi imota yabo ize ingqikile isihlahla ngesikhathi igijinyiswa nguConstable Sakala weZRP Mkoba,” kutsho uCommissioner Nyathi.
Uthe amapholisa ananzelele amavidiyo abhodayo kunkundla zokuxhumana ngesehlakalo lesi.
“Kulandela ukubhoda kwevidiyo yengozi yemota kunkundla zokuxhumana umthetho uzadlala indima yawo ngendlela uConstable Sakala aziphatha ngayo.”
