admin
Nkosilathi Sibanda
UKWEHLULEKA kweqembu leHighlanders ukubhadala iholo labadlali lezisebenzi zalo akuqalisi ngenxa yokuthi sekubusa uJohnfat Sibanda.
Lokhu kubikwe ngabalandeli baleliqembu asebesole indlela osekuphethwe ngayo udaba lokuthi abadlali sebeqede inyanga lezinyanga bebulawa yindlala. Iminwe ikhomba ebusweni buka-Sibanda umgcinisihlalo osekhudumeze isihlalo kusukela ngoMbimbitho.
Iqembu licine ukubhadala ngoNkwenkwezi, okwaba liholo elingatsho lutho ngokubika kwabo abadlali ngoLwesibili emini bekhuluma lephephandaba likazulu.
Abadlali bonke abe-Bosso bafike bazithela emahofisini besithi bafuna ukubona uSibanda. Umgcinisihlalo wehluleke ukuza. Inhloso yabadlali bekuyikufuna ukuzwa kumgcinisihlalo ngokwakhe ukuthi kungani besehluleka ukubaholisa njengesithembiso sesivumelwano.
“Sifuna yena, hatshi abanye laba abalokhe besitshela amanga,” kutsho omunye wabadlali omdala kuleliqembu esethula okwenzakeleyo.
Abaqalisi abadlali laba ukutshengisela ngodubo abalalo.
Lokhu sekukhweze ulaka lakubalandeli labathandi beHighlanders asebebike ukuthi umgcinisihlalo uSibanda ancediswe.
Sekuqale owayelilunga lebhodi uRetired Colonel Thomas Ngwenya osephosele i$1 000 eyokuthi igcwalise ingcebethu yemali yeholo.
UNgwenya uthe kuyamdanisa ukubala kumaphephandaba ukuba iqembu liyehluleka khona ukubhadala isenti.
“Asincedisaneni. Iqembu leHighlanders ngelethu,” kutsho uNgwenya ekhuluma lentatheli kaMthunywa esecingweni.
Kuminyaka edluleyo, abalandeli benelisa ukuthi bakhiphe iBosso ezikweledeni ngokusungula inhlelo ezithile.
Inengi lizakhumbula ukuba ngesizini edluleyo, iqembu labethwa ngumoya lasala lingasela ngitsho lesisodwa isikwelede esibhalwe emhlane.
Umlandeli omkhulu weHighlanders uNodumo Nyathi waqhuba umkhankaso kunkundla zokuxhumana ezeFacebook kanye leTwitter lapho okwatholakala imali edlula i$400 000 ngenyanga kaNkwenkwezi loNhlangula, okwenza iBosso yasala lesikwelede se$462 000 sisuka ku-$862 8688 ngokuphazima kweso.
Pho kwehlulani ukuthi kuqalwe omunye umkhankaso weholo labafana?
Online Reporter