admin
YiNtatheli KaMthunywa
KULIMPELAVIKI umqeqetshi weChicken Inn uRahman Gumbo ulakho ukuthi aphangise ukubuyela empilweni kalova, kukanti uErol Akbay weHighlanders laye engapakitsha abuyele kibo.
Bobabili labo bagcine imisebenzi yabo ngemikhuleko nanko phela inkokheli zamaqembu la sezibophe iqhinga lokuthi zibasuse ezikhundleni.
URahman nguye okuzwakale esenkingeni yokugecwa kuChicken Inn ngoba esenqotshwe okwedlulisileyo.
Kuzabonakala ngeSonto ukuthi nguphi phakathi kwabaqeqetshi laba ozenelisa ukuxotshisa omunye. IBosso inxusa umakhelwane wayo lo kumdlalo wesitshiya galolunye kunobhutshuzwayo we-Castle Lager.
UGumbo usenqobe umdlalo owodwa phakathi kweyisikhombisa kuligi yeCastle Lager.
Enkambeni yeBosso uAkbay usekhuthazwe ukuthi ananzelele engayangisi ngokuqhubeka edliwa mahlayana. UAkbay usetshove imidlalo emithathu ilandelana enqotshwa.
Udletshana olufinyelele iphephandaba likazulu luveza ukuthi umgcinisihlalo wamaGamecocks udla amalangabi ngokwehluleka kukaGumbo ukuthi avuse lithimu eyacina ukujabula ngesikhathi iqeqetshwa nguJoey Antipas.
“Inkokheli zethimu zidanile. Inhloso yeqembu kulisizini kwakuyikugcina isicoco seligi yeCastle Lager njalo. Lonyaka kwehlule lokhu. Umgcinisihlalo uqonqosele ukuthi umqeqetshi akhweze ijogwe, abone ukuthi ithimu iyanqoba kumidlalo ezayo,” kutsho umfakazi owayephakathi kwalumhlangano.
UAntipas wayifulathela iChicken Inn elubhekise ku-AmaZulu eSouth Africa ngoMabasa. Abadlali abasuka bathengwa yiKaizer Chiefs babalisa uEdmore Chirambadare loMitchelle Katsvairo.
Loba uAntipas watshiya ithimu le isiqamukile kulandela ukuhamba kwabanye abadlali bayo, umlandu wokunqotshwa kwayo kuligi usuwetheswe uGumbo.
UNcube walile ukukhuluma okunengi mayelana lomsebenzi kaGumbo kodwa uvumile ukuthi benza umhlangano wokuhlaziya impumela yethimu kumidlalo edluleyo.
“Sikhathazekile ngempumela yemidlalo yethu. Imihlangano enjengale sihlala siyenza maviki wonke.”
Ngempelaviki edluleyo iChicken Inn iqede ingutshiki lobhanqa 0-0 leChapungu. Lokho kutsho ukuba intshantshu zeCastle Lager zihlezi kunombolo yetshumi kungalane.
Impumela yemidlalo yeCastle Lager edlalwe ngempelaviki: Tsholotsho 0, Caps United 1; Ngezi Platinum 2, Chicken Inn 1; Harare City 2, ZPC Kariba 0; Chapungu 1, Triangle 0; Border Strikers 0, Bulawayo City 1; FC Platinum 1, Hwange 1; Dynamos 0, How Mine 0; Highlanders 1, Mutare City 2.
Imidlalo ekhona:
NgoMgqibelo: Ngezi Platinum v How Mine (Baobab); Harare City v Border Strikers (Rufaro); Chapungu v ZPC Kariba (Ascot); Tsholotsho v Triangle (Luveve); FC Platinum v Mutare City (Mandava).
NgeSonto: Highlanders v Chicken Inn (Barbourfields); Dynamos v Bulawayo City (Rufaro); Hwange v Caps United (Colliery).
Online Reporter