Online Reporter
Nkosilathi Sibanda
IZimbabwe Football Association (Zifa) isiqinisekisile ukuthi ilizwe lizaphatha umqhudelwano omkhulu wabasakhulayo oweCaf African Schools Football Championship Continental Finals, ozadlalwa kusukela mhlaka 2 kusiya ku 10 Mabasa eHarare.
IZifa ithe lokhu kuyimpumelelo enkulu ebholeni lakuleli, njengoba sekuyiminyaka edlula eyisithupha ilizwe lingaphathi imiqhudelwano yeConfederation of African Football (Caf).
Umqhudelwano lo ubalwa phakathi kwemikhulu ebalulekileyo ekuthuthukiseni ibhola labatsha e-Africa, njalo unika ithuba izikolo, umphakathi kunye labalandeli ukuthi babe yingxenye yomdlalo.
Kulemivuzo emikhulu lapho izikolo ezizaphumelela kuzigaba zabafana labamantombazana zizathola i-US$300 000. Ezesibili zizathola i-US$200 000, kuthi ezesithathu zithole i-US$150 000. Imali le izasetshenziswa ukuthuthukisa izakhiwo ezikolo ezifana lamakilasi, ama-library lenkundla zemidlalo.
Amaqembu angu-16 azaphatheka kumqhudelwano lo, ehlanganisa abaphumelele kuma-zones lamanye amaqembu anxusiweyo.
Kuzigaba zamantombazana kuzadlala iZimbabwe, Ghana, Burkina Faso, Morocco, Guinea, Tanzania, Zambia leDR Congo.
Kuzigaba zabafana kuzaba leZimbabwe, Tanzania, Benin, Morocco, Senegal, Uganda, Zambia leDR Congo.
Imininingwane ephathelane lokuqoqwa kwamaqembu izamenyezelwa kumalanga alandelayo, ngokutsho kweCaf.
“IZifa iyakwamukela ukuphiwa ithuba lokuphatha imidlalo yiCaf kusukela mhlaka 2 kusiya ku-10 Mabasa 2026,” kutsho iZifa kumbiko wayo.
“Ukuqhutshwa kwalumqhudelwano kutshengisa ukuthi ilizwe selithembekile njalo liyazi ukuphatha imiqhudelwano emikhulu.”
Umqhudelwano lo wasungulwa ngomnyaka ka-2021 ngaphansi kobukhokheli bukamkhokheli weCaf uPatrice Motsepe.
Sekube labantwana abaphezu kwezigidi ezintathu abavela kuzikolo ezingu-82 477 emazweni angu-48 asebephatheke kulumqhudelwano.
