Online Reporter
Nkosilathi Sibanda
UHAMBO lukaMongameli u-Emmerson Mnangagwa lokuya kweleBelarus lube yimpumelelo njalo kukhangelelwe ukuthi izivumelwano phakathi kwamazwe womabili ziphathise ekwakheni umkhonomi wakuleli.
UMongameli uMnangagwa ubeseBelarus okwamalanga amane, elande ukuyaqinisa ubudlelwano beZimbabwe leBelarus lapho ahlangane loMongameli wakulelo, u-Aleksandr Lukashenko.
Omunye wamalunga kaHulumende obehambe loMongameli Mnangagwa bekunguMphathintambo wogatsha lweFinance, Economic Development and Investment Promotion, uSikhwicamfundo uMthuli Ncube, ofike wenza imihlangano eminengi labanye abaphathi bengatsha zikaHulumende weBelarus.
“Ingxoxo zonke zidale ukuthi kube lezivumelwano eziqinisa ezokuthengiselana lokuthuthukiswa kwamabhizimusi.
Ingxoxo lezi kukhangelelwe ukuthi zibe yisiqalo sokuvuka kwamabhizimusi kuleli. Kukhangelelwe njalo ukuthi osomabhizimusi bakuleli bafunde okunengi kuBelarus.
“Sikhethe ingatsha ezithile, ezifuna ukuqondiswa kumkhonomi wethu, sikhangele kwezokuthengiselana,” kutsho uSikhwicamfundo uNcube.
Uhambo lweBelarus beluphinde lwaba yikugcwalisisa ukuvakatsha kukaMongameli uLukashenko kuleli.
Ingatsha zomkhonomi ezikhangelelwe ukuphakanyiswa zibalisela ezokulima lapho osekufike khona amathalakitha avela eBelarus, ezempilakahle ngokwengezwa kwesibhedlela seParirenyatwa Group of Hospitals, lezinye ingatsha.
