adminBabamudiki vanovhurira maiguru zipi
Yvonne Chidochashe Manyanja
VANHU vaive mudare vakashamiswa apo mumwe mukadzi, uyo anove shirikadzi, akati muramu wake anomupindira mumba otanga kumupfimba akabata sikarudzi yake masikati machena.Prisca Dhumba akaendesa Nicodemus Nyakudya kuHarare Civil Court achiti anomuvinga mumba akavhura zipi yebhurugwa rake otanga kumupfimba uye kana aramba obva amurova pamwe nekumutukidzira. “Murume wangu akafa mugore ra2010, uye kubva ipapo handina mufaro nababamudiki ava. Vanondiudza kuti vanondida. Izvi vanozviita masikati machena vakandiburitsira sikarudzi yavo. “Ndave kutotya kuti kana vana vangu vanogona kuvabata zvisirizvo sezvo varatidza kuti vanoda kuti ini amai vavo ndishungurudzike. Pandakavaramba ndichiti muri kundisemesa, vakabva vandirova vakatanga kundituka vachiti ndinorwara nemukondombera uye ndiri pfambi yemakoko.
“Mumwe musi vakandipazira gonhi mumba mangu ndakarara ndikavabvunza kuti vakanga vachizviitirei vakanditi ndikurumidze kubva pamubhedha vachiti ndakanga ndakarara nemunhu asi pavakapinda hapana kana wavakaona,” akadaro Dhumba.
Nyakudya akaramba mhosva yaari kupomerwa achiti vanonetsana nemuramu wake nenyaya yekugova nhaka yemidziyo yemukoma wake.
“Changamire, zvavataura ndazvinzwa asi handicho chokwadi, amaiguru vanogara mumba mangu uye mukoma wavari kuti mukoma wangu haasi mwana waamai vangu. Saka nyaya ndeyekuti havasi kuda kubva vachinogara patiri kuda kuvapa kuti vagare,” akadaro.
Mutongi Gamuchirai Siwardi akapa gwaro redziviriro kuna Dhumba.
Online Reporter