admin
Pumulani Mpofu
Inengi labadala lalikhaliphile kakhulu njalo lalisenelisa ukuba lilungiselele ikusasa labantwababo yikho babethenga izindlu, izimota, inkomo kanye lokunye okunengi. Lokhu babekwenzela ukuthi lapho sebethe badlula kulo umhlaba abantwana basale belokungabaphathisa ukuze impilo yabo isale ifanana lalapho abazali besaphila.
Kudala kwakuthi nxa umuntu esezabhubha wayetsho amazwi akhe okucina ukuthi ozasala egcina abantwabakhe ngubani njalo ilifa lakhe labiwe njani. Lokhu babekwenza ngoba besazi ukuba kukhona izihlobo ezingamagovu ezijabulela ukudla amandla abanye zinganakile ukubana abantwana bazasala besondliwa ngani. Ubugovu bezihlobo babudala ukuba abantwana basale sebehlupheka ngoba bengelawo amandla okulwisana lezihlobo zakibo njalo besesaba ukuba sebengaphoswa bacine besifa betshiya lelo lifa langakibo.
Kulezinsuku sokuphucukile kakhulu ngoba umthetho wakunanzelela ukuba ubugovu bezihlobo sobutshabalalisa intokozo ebantwaneni bakamufi, yikho ke bahlela imithetho ephathisayo nxa kusabiwa ilifa njalo ipha abantu ithuba lokubophisa lowo othatha ilifa yena engelasabelo.
Kuliviki ngithole ithuba lokuxoxisana lodade okuthiwa nguThubelihle Mlilo. UThubelihle uzalwa eNkayi emulini yabantwana abane.
Unina kaThubelihle wayezakhele eyedwa njengomuntu ongazange ende njalo wayethenge indlu yakhe elokitshini leNketa koBulawayo. Ngemva kokufa kwakhe izihlobo zaya emthethwandaba kwakhethwa owayezakhangela uThubelihle (guardian) njalo uThubelihle wakhethwa waba yindlalifa yelifa likanina.
Umalumakhe uDumisani Mpofu nguye owanikezwa iCertificate of heir. Lincwadi yayiveza ukuba uDumisani nguye ozagcina uThubelihle kuze kufike isibanga sokuthi sekhulile athathe indlu ngoba yayivele iphiwe yena uqobo lwakhe.
Lokhu ke kwazwisa abanye abafowabo bakaThubelihle ubuhlungu ngakho-ke baqala ukumlwisa bethi bona bonke balelungelo kuleyondlu loba nje unina watshiya ebhale kwabasobala ukuthi indlu ngekaThubelihle.
Umalume uDumisani laye ngomunye ombangisa leyondlu sekuze sokuliwa ngomuthi ngoba eyinyanga enkulu eyaziwayo khonale eHwange.
Konke lokhu sokudala ukuba uThubelihle ahlale engumuntu ogulayo njalo esesaba ukuthi bangaze bambulale ngenxa yendlu leyo abambangisa yona. Inhlanganiso yeTrinity Project yamphathisa ngokuba aye emthethwandaba ukuze lababantu abambangisa indlu babotshwe ngumthetho njalo enelise ukuba atshintshe ibizo lendlu ukuze ahlale kuyo. Izihlobo zonke sezimjikela uThubelihle ngoba labo befuna isabelo kundlu yakhe. Into nje ejabulisayo yikuthi umthetho uzamlwela uThubelihle aze acine ephiwa ilifa lakhe alitshiyelwa ngunina.
Sikhuluma nje uThubelihle usephakathi kokulandela izinqumo zomthethwandaba ezizadala ukuthi athole ilifa lakhe.
Ingqobe engilitshiyela yona yikuba masingabi ngamagovu sidle ilifa labanye abantwana kodwa masibasizeni ukuze bakhule bengela kwesaba njalo belokuthemba umphakathi.
Masihlanganeni njalo kuviki elizayo .
Umlobi utholakala kukheli ethi [email protected] loba kunombolo ezithi 0773165055.
Laku www.trinityproject.biz
Online Reporter