Online Reporter
Brandon Moyo
IZIMBABWE ilembali enhle njalo ihlonitshwa kakhulu kumdlalo we-rugby emhlabeni, nanko yaba lilizwe lakuqala ele-Africa ukuncintisa kuWorld Cup ngo-1987.
Iqembu lamaSables laphinda njalo ukuya enkundleni eziphakemeyo kunkezo yomhlaba kulumdlalo ngo-1991. Kusukela lapho, isisindo somdlalo sehla. Abalandeli lokhe besaphethe amathemba okuthi ilizwe lizaphenduka kuWorld Cup.
Sekungenzeka lokhu ngoMgqibelo lapho amaSables azadlala khona leNamibia, edinga itikiti lokuya kuWorld Cup. Kulandela ukunqoba kumidlalo emibili, amaSables aphumelele ukuya ku-Rugby Africa Cup, okungumqhudelwano osetshenziswa njengenkundla yokukhetha intshantshu ezizakuya kuRugby World Cup ka2027.
NgeSonto edluleyo iZimbabwe inqobe iKenya 29-23 edolobheni leKampala, kumdlalo ochazwe ngokuthi ubunzima kodwa abafana bakuleli bazimisele kwaze kwayovalwa.
Ukaputeni weqembu uHilton Mudariki uthe: “Kunzima ngaso sonke isikhathi ukudlala leKenya. Sibonga ukuzimisela kwabadlali bethu kusukela ngomzuzu wakuqala.
Impumela le iyasijabulisa. Siqala ihlandla lesibili lomdlalo sisemuva, kodwa kasizange sitatazele. Siwubambile umdlalo senelisa ukuthi sikhokhele.”
Ukunqoba lokhu kubeke amaSables phambili kwesinye isitha esikhulu, iNamibia, yona enqobe i-Algeria 21-7, komunye umdlalo wama-semi final.
Abafana bakuleli bayazi ukuthi yini ebalinde phambili kumdlalo wabo leNamibia.
Kodwa loba usethusa lumdlalo, iZimbabwe ingena kuwo ilokuzethemba nanko, ngomnyaka odluleyo yanqoba iNamibia 32-10 kuma semi-final.
