Online Reporter
ABAHLABELELI abasakhulayo sebenze umsebenzi omuhle elizweni ukulibazisa abantu kungakho-ke kuhle sibatshayele ihlombe.
Inengi lizavuma ukuthi ithuba elinikezwa abahlabeleli kumabonakude kunye lakumawayilesi liguqule indlela abahlabeleli ababekhangelwa ngayo.
Uzwa labadala nxa belaya abantwana kulezi insuku bakhuluma amabala okuhlakanipha abake bawezwa kungoma ethile.
Lokhu kutsho ukuthi ingoma seziwenza umsebenzi wazo ngokugcweleyo, umsebenzi wokufundisa.
Okumqoka esikubonayo kubahlabeleli balamuhla esithanda ukukukhangela yindlela asebesebenzelana ngayo.
Abahlabeleli sebebambene, sebengabantu banye. Uthola labo asebethuthukile kwezomculo bencedisa abasakhulayo okunika umculo wakuleli isisindo.
Yebo kudala abahlabeleli babeke bancedisane kodwa kwakungandanga ukuthi bakwenze lokhu ngoba bebona umculo wabo utshiyene njalo ukholisisa ukwedlula owomunye.
Lamuhla abahlabeleli abahlabela imihlobo yengoma etshiyeneyo uthola bekholisisa abantu ngendlela emangalisayo.
Okunye njalo okuthabisayo yindlela abantu bakuleli abamukela ngayo abahlabeleli babo.
Amadlalade abahlabeleli abasakhulayo abantu sebephanga bawadinge ebulenjini uzwe sebetshaya ingoma zakhona endaweni ezehlukeneyo ngoba bethanda ukuthi ziphe imfundiso ethile ebantwaneni babo.
Loba kunjalo sixwayisa abahlabeleli ukuthi bangaze bapheka ingoma zabo begijima ngoba befuna ukuyakwenza ama-shows okuthi bathole imali. Nxa ingoma ingaphekwanga kuhle kuveza ukuba umhlabeleli kalandaba labalandeli bakhe.
Kuhle ukuthi abahlabeleli abasakhulayo, bathi nxa bexwayiswa yilabo abazi ezomculo bangephuleli izigodo endlebeni ngoba abantu bengacina bengasalandeli umculo wabo ngoba bepheka ingoma zabo bejahile.
Akulamuntu ongafuna ukulahla imali yakhe esiyangena ku-show azi mhlophe ukuba umculi wakhona kapheki ingoma zakhe ngobunono.
Kuyadanisa njalo ukuthi inani labahlabeleli elingathathi isikhathi lipheka kuhle amadlalade alo seliphambanisa labanye abahlabeleli abasakhulayo abenza kuhle.
Abantu bacina bengasangeni kuma-shows abanye abahlabeleli futhi bengasathengi lamadlalade abo nanko labadala bayatsho ukuthi zonelwa mvunye.
Abahlabeleli kuhle njalo baziqoqe benze imikhosi yabo bodwa hatshi ukulindela imikhosi yelizwe kuphela. Inhlanganiso ezibona ngezokuzithokozisa elizweni zizimisele ukuphathisa abahlabeleli abangathi bayaphumelela njalo bethandwa ngabantu.
Kungakho-ke abahlabeleli kulokuthi bahlabe umkhosi bekhalaza ngokuswela ithuba kumikhosi etshiyeneyo kwehlulani ukuthi bazisungulele eyabo imikhosi.
Isibonelo esihle ngumkhosi obusenzelwa kweleSouth Africa oqoqwa nguDJ Mapressa osusiza kuleli oweDJ Mapressa Glam and Fashion Show. Umkhosi lo ulodumo olukhulu njalo kusobala ukuthi uzathokozisa abanengi lakuleli.
Uzulu simtshayela ihlombe ngokuphathisa abahlabeleli abasakhulayo, ngokubathuthukisa kunye lokubancedisa ekuphekeni amadlalade abo.
